ყიდვა-გაყიდვის აპლლიკაცია Phubber-ის ერთ-ერთი დამფუძნებელი გიორგი ჩუგოშვილი dev.ge-სთან ამბობს, რომ რუსული, რეპრესიული კანონის მიღების შემთხვევაში შესაძლოა მის კომპანიას და გუნდს აგენტების სახელი დაერქვათ, რაც ინვესტიციების მოზიდვისთვის ცუდი იქნება.
ყიდვა-გაყიდვის აპლლიკაცია Phubber-ის ერთ-ერთი დამფუძნებელი გიორგი ჩუგოშვილი dev.ge-სთან ამბობს, რომ რუსული, რეპრესიული კანონის მიღების შემთხვევაში შესაძლოა მის კომპანიას და გუნდს აგენტების სახელი დაერქვათ, რაც ინვესტიციების მოზიდვისთვის ცუდი იქნება.
გიორგი ჩუგოშვილი ამბობს, რომ Phubber-ის ინვესტიციების დაახლოებით 80% უცხოეთიდან შემოდის.
«დემოკრატიისთვის რომ ცუდია ეს კანონი გასაგებია. რაც შეეხება, IT სექტორსა და სტარტაპ ინდუსტრიას — ჩვენი უმეტესობა ინვესტიციების მოზიდვას საქართველოს გარედან ცდილობს.
მთელი ინდუსტრიის იდეაც ისაა, რომ ვენჩერულ კაპიტალზე და NGO-ებზე გავიდეთ. მათგან ვიზიდავთ თანხებს და ხდებიან საქართველოს ეკონომიკის ინვესტორები.
რაც საქართველოში ინვესტიციების მოზიდვას ხელს უშლის, ყველაფრის წინააღმდეგი ვარ. რაც ქვეყნისა და ინდუსტრიის განვითარებას ხელს უშლის იმაზე, რა თქმა უნდა, ხმა უნდა ამოვიღოთ». — ამბობს გიორგი.
საქართველოს ხელისუფლება და «ქართული ოცნებიდან» ფორმალურად გასული დეპუტატების ჯგუფი გეგმავს, დაამტკიცოს კანონპროექტი, რომელიც «უცხო ქვეყნის გავლენის აგენტებს» ეხება.
ე.წ ხალხის ძალის კანონპროექტი, რომლის განხილვაც პარლამენტში უკვე დაიწყო, არსით რუსული და რეპრესიულია. დოკუმენტის თანახმად, უცხო ქვეყნის აგენტებად უნდა დარეგისტრირდნენ არასამთავრობო ორგანიზაციები, მედიები და სხვა იურიდიული პირები, რომელთა შემოსავლის 20%-ზე მეტის «წყარო უცხოური ძალაა».
ამ ვერსიის თანახმად, ყველა ზემოთჩამოთვლილი სუბიექტი საჯარო რეესტრში თავად უნდა დარეგისტრირდეს აგენტად, წინააღმდეგ შემთხვევაში კი რამდენიმე ათასლარიანი ჯარიმის გადახდა მოუწევს.
კანონპროექტი «ქართულმა ოცნებამ» მოიწონა და თავადაც დაარეგისტრირა მისი გაუარესებული ვარიანტი, რომელიც სისხლის სამართლის პასუხისმგებლობას და პატიმრობას ითვალისწინებს კანონით გათვალისწინებული მოთხოვნების შეუსრულებლობის შემთხვევაში.
ამ ვარიანტის მიხედვით, შესაბამისი განცხადება საქართველოს გენერალურ პროკურორს უნდა წარედგინოს.
კანონპროექტის გაუარესებულ ვერსიაში უცხოეთის აგენტად რეგისტრაციის ვალდებულება ექნება ნებისმიერ ფიზიკურ და იურიდიულ პირს, რომელიც დაფინანსებას უცხოეთიდან იღებს და არ არის დიპლომატი, კონსული, დიპლომატიური სამსახურისა და საკონსულო დაწესებულების თანამშრომელი.
კანონი არ შეეხება უცხო ქვეყნის თანამდებობის პირებს, ასევე, პირს, რომელიც საქველმოქმედო საქმიანობას ეწევა, პირს, რომელიც რელიგიურ, საგანმანათლებლო, მეცნიერულ, აკადემიურ ან სახელოვნებო საქმიანობას «კეთილსინდისიერად» ეწევა. თუმცა, არ ვიცით, კანონპროექტის ავტორები როგორ ინტერპრეტაციას გაუკეთებენ «კეთილსინდისიერ» საქმიანობას.
ქართველმა მეწარმეებმა და სტარტაპერებმა რუსული კანონის წინააღმდეგ განცხადება გაავრცელეს.
მასში მითითებულია, რომ ისინი კატეგორიულად ეწინააღმდეგებიან მმართველი პარტიის და «ქართული ოცნებიდან» ფორმალურად გასული დეპუტატების ამ ინიციატივის კანონად ქცევას.
მათი თქმით, კანონი საქართველოს განვითარების შესაძლებლობას ართმევს და პარტნიორებისადმი მტრულ დამოკიდებულებას ავლენს.
