ფინანსები

ფინანსისტმა, თბილისის საფონდო ბირჟის აღმასრულებელმა დირექტორმა, ნინო ქურდიანმა დეტალურად უპასუხა საპენსიო დანაზოგების ინვესტირების შესახებ საზოგადოებაში გაჩენილ კითხვებს.  დათქმა: გამოყენებული ტერმინები და განმარტებები ხშირად გამარტივებულია ტექსტის ადვილად აღქმის მიზნით.  წინამდებარე განმარტებები არ არის საინვესტიციო რჩევა. 

ინვესტიცია ის აქტივია, რომელსაც ფიზიკური პირი და/ან ორგანიზაცია მომავალში მოგების მიღების მოლოდინით ყიდულობს. ანუ, ეს არის მოგების ან სხვა ეკონომიკური ეფექტის მიღების მიზნით ფულის დაბანდება. ინვესტირება საშუალებაა, დღევანდელი შემოსავლები სამომავლო მოგების წყაროდ ვაქციოთ.

2023 წლის 6 აგვისტოდან საპენსიო სააგენტომ მოქალაქეების დანაზოგები მაღალრისკიან აქტივებში განათავსა. თანხა, რომელსაც სააგენტო დაგროვებითი საპენსიო სქემის მონაწილეების გადასახადებიდან გროვდება, ამ დრომდე დაბალრისკიან აქტივებში იყო განაწილებული — სახელმწიფო ობლიგაციებსა და საბანკო დეპოზიტებში. დაგროვებითი პენსიის შესახებ 2018 წელს მიღებული კანონის თანახმად, პირველი 5 წლის განმავლობაში საპენსიო აქტივების ინვესტირება მხოლოდ ნაკლებად რისკიან საინვესტიციო პორტფელში ხდებოდა. 2023 წლის 6 აგვისტოდან კი ხელმისაწვდომი გახდა საშუალო და მაღალრისკიანი ინვესტიციებიც.