კრიპტო ბაზრის აღმასრულებელი დირექტორი ავთანდილ კუჭავა dev.ge-სთან იმ უარყოფით შედეგებზე საუბრობს, რასაც ე.წ აგენეტების შესახებ რუსული, რეპრესიული კანონის დამტკიცება მოუტანს IT სექტორს.
კრიპტო ბაზრის აღმასრულებელი დირექტორი ავთანდილ კუჭავა dev.ge-სთან იმ უარყოფით შედეგებზე საუბრობს, რასაც ე.წ აგენეტების შესახებ რუსული, რეპრესიული კანონის დამტკიცება მოუტანს IT სექტორს.
ავთანდილ კუჭავას აზრით, კანონი, პირველ რიგში, IT სფეროში მომუშავეებს ხარჯებს გაუზრდის.
«კანონი ბიუროკრატიას გაართულებს, რის გამოც ჩვენი კომპანიები უცხოელებისთვის მიმზიდველი არ იქნება. თუ კომპანიებს საერთაშორისო პარტნიორების დაკარგვა აწყობთ, შეუძლიათ მშვიდად შეეგებონ კანონის». — ამბობს ის.
საქართველოს ხელისუფლება და «ქართული ოცნებიდან» ფორმალურად გასული დეპუტატების ჯგუფი გეგმავს, დაამტკიცოს კანონპროექტი, რომელიც «უცხო ქვეყნის გავლენის აგენტებს» ეხება.
ე.წ ხალხის ძალის კანონპროექტი, რომლის განხილვაც პარლამენტში უკვე დაიწყო, არსით რუსული და რეპრესიულია. დოკუმენტის თანახმად, უცხო ქვეყნის აგენტებად უნდა დარეგისტრირდნენ არასამთავრობო ორგანიზაციები, მედიები და სხვა იურიდიული პირები, რომელთა შემოსავლის 20%-ზე მეტის «წყარო უცხოური ძალაა».
ამ ვერსიის თანახმად, ყველა ზემოთჩამოთვლილი სუბიექტი საჯარო რეესტრში თავად უნდა დარეგისტრირდეს აგენტად, წინააღმდეგ შემთხვევაში კი რამდენიმე ათასლარიანი ჯარიმის გადახდა მოუწევს.
კანონპროექტი «ქართულმა ოცნებამ» მოიწონა და თავადაც დაარეგისტრირა მისი გაუარესებული ვარიანტი, რომელიც სისხლის სამართლის პასუხისმგებლობას და პატიმრობას ითვალისწინებს კანონით გათვალისწინებული მოთხოვნების შეუსრულებლობის შემთხვევაში.
ამ ვარიანტის მიხედვით, შესაბამისი განცხადება საქართველოს გენერალურ პროკურორს უნდა წარედგინოს.
კანონპროექტის გაუარესებულ ვერსიაში უცხოეთის აგენტად რეგისტრაციის ვალდებულება ექნება ნებისმიერ ფიზიკურ და იურიდიულ პირს, რომელიც დაფინანსებას უცხოეთიდან იღებს და არ არის დიპლომატი, კონსული, დიპლომატიური სამსახურისა და საკონსულო დაწესებულების თანამშრომელი.
კანონი არ შეეხება უცხო ქვეყნის თანამდებობის პირებს, ასევე, პირს, რომელიც საქველმოქმედო საქმიანობას ეწევა, პირს, რომელიც რელიგიურ, საგანმანათლებლო, მეცნიერულ, აკადემიურ ან სახელოვნებო საქმიანობას «კეთილსინდისიერად» ეწევა. თუმცა, არ ვიცით, კანონპროექტის ავტორები როგორ ინტერპრეტაციას გაუკეთებენ «კეთილსინდისიერ» საქმიანობას.
