DataReportal-მა, რომელიც მომხმარებლებს გლობალური ციფრული ცხოვრების შესახებ სტატისტიკებსა და კონკრეტულ ციფრებს სთავაზობს, შეაჯამა, თუ როგორ იყენებენ ადამიანები საქართველოში ციფრულ მოწყობილობებსა და სერვისებს 2023 წელს.
DataReportal-მა, რომელიც მომხმარებლებს გლობალური ციფრული ცხოვრების შესახებ სტატისტიკებსა და კონკრეტულ ციფრებს სთავაზობს, შეაჯამა, თუ როგორ იყენებენ ადამიანები საქართველოში ციფრულ მოწყობილობებსა და სერვისებს 2023 წელს.
DataReportal-ის მიმოხილვაში განხილულია, თუ როგორი იყო ინტერნეტის მასშტაბი და სიჩქარე საქართველოში 2023 წელს. გთავაზობთ რამდენიმე საინტერესო სტატისტიკას.
DataReportal-ზე დაყრდნობით, 2023 წლის დასაწყისში საქართველოში ინტერნეტის 2,86 მილიონი მომხმარებელი იყო, ხოლო ინტერნეტის შეღწევადობა 76,4 პროცენტს შეადგენდა.
ციფრების კიდევ უფრო ღრმად გასააზრებლად და დამატებითი კონტექსტის შემოსატანად, DataReportal-მა საქართველოს მოსახლეობის რაოდენობაზეც ისაუბრა.
როგორც ცნობილია, საქართველოს მოსახლეობა 2023 წლის იანვარში 3,74 მილიონი იყო. მონაცემები აჩვენებს, რომ საქართველოს მოსახლეობა 2022-2023 წლებში 18 ათასით (-0,5 პროცენტით) შემცირდა. ხოლო ქვეყნის მაცხოვრებლების საშუალო ასაკი 36,6 წელს შეადგენდა.
DataReportal-ის იდენტური პლატფორმის, Kepios-ის ანალიზი აჩვენებს, რომ 2022-2023 წლებში საქართველოში ინტერნეტის მომხმარებლების რაოდენობა 14 ათასით (-0,5 პროცენტით) შემცირდა.
თვალსაჩინოებისთვის, ეს მაჩვენებლები ცხადყოფს, რომ 2023 წლის დასაწყისში საქართველოში ინტერნეტს 880.0 ათასი ადამიანი არ იყენებდა, რაც იმაზე მეტყველებს, რომ წლის დასაწყისში მოსახლეობის 23.6 პროცენტი ხაზგარეშე დარჩა.
DataReportal-მა ინტერნეტის სიჩქარეზეც ისაუბრა — Ookla-ს მიერ გამოქვეყნებული მონაცემები მიუთითებს, რომ საქართველოში მობილური ინტერნეტის საშუალო სიჩქარე ფიჭური ქსელების საშუალებით 33.67 Mbps-ს შეადგენდა, ხოლო ფიქსირებული ინტერნეტის საშუალო სიჩქარე 25,97 Mbps იყო.
Ookla-ს მონაცემებით ირკვევა, რომ მობილური ინტერნეტის საშუალო სიჩქარე საქართველოში 2023 წლის დასაწყისისთვის 4,45 Mbps-ით (+15,2 პროცენტი) გაიზარდა.
ამავდროულად, Ookla-ს მონაცემები აჩვენებს, რომ საქართველოში ფიქსირებული ინტერნეტის სიჩქარე, იმავე პერიოდში, 5,71 Mbps-ით (+28,2 პროცენტი) გაიზარდა.
