ეკონომიკური თანამშრომლობისა და განვითარების ორგანიზაციის მიერ გამოქვეყნებული ახალი ანგარიშის, SME Policy Index-ის თანახმად, საქართველოში ფიქსირებული ინტერნეტის ფასი ტელეკომუნიკაციის საერთაშორისო კავშირის (ITU) მიერ რეკომენდირებულ ზღვარს, კერძოდ, მთლიანი ეროვნული შემოსავლის 2%-ს აღემატება და 2,35%-ს შეადგენს.
ეკონომიკური თანამშრომლობისა და განვითარების ორგანიზაციის მიერ გამოქვეყნებული ახალი ანგარიშის, SME Policy Index-ის თანახმად, საქართველოში ფიქსირებული ინტერნეტის ფასი ტელეკომუნიკაციის საერთაშორისო კავშირის (ITU) მიერ რეკომენდირებულ ზღვარს, კერძოდ, მთლიანი ეროვნული შემოსავლის 2%-ს აღემატება და 2,35%-ს შეადგენს.
ამასთან ერთად, ქვეყნისთვის მნიშვნელოვანი პრობლემაა მაღალსიჩქარიან ინტერნეტზე ხელმისაწვდომობა — საქართველოში ინტერნეტთან დაკავშირებული კომპანიების უმრავლესობა 30 მბ/წმ-ზე დაბალი სიჩქარის ინტერნეტით სარგებლობს.
OECD-ის თანახმად, მსხვილი კომპანიების თითქმის 80%-ს მაღალსიჩქარიან ინტერნეტზე (30 მბ.წმ-ზე მეტი) აქვს წვდომა, საშუალო კომპანიებისთვის ეს მაჩვენებელი — 54%-ია, მცირე კომპანიებისთვის კი — 38%.
კვლევაში წერია, რომ ეს არაპროპორციული გადანაწილება და არათანაბარი გარემო ქვეყნის განვითარებისთვის შემაფერხებელი ფაქტორია.
როგორც ანგარიშში ვკითხულობთ, ინტერნეტზე ხელმისაწვდომობის პრობლემების შედეგია ის, რომ ქვეყანაში ფიქსირებული და მობილური ინტერნეტის მომხმარებელთა რიცხვი OECD-სა და ევროკავშირის ქვეყნების საშუალო მაჩვენებელზე დაბალია.
ანგარიშში ყურადღება გამახვილებულია იმ პოზიტიურ ცვლილებებზეც, რომლებიც საქართველოს ინტერნეტის ხელმისაწვდომობის კუთხით უკვე აქვს.
კერძოდ:
2015-2020 წლებში გაორმაგებულია ფართოზოლოვანი ინტერნეტის მომხმარებელთა რიცხვი, ასევე, მიმდინარეობს სამუშაოები ქვეყნის 99%-ის 4G ინტერნეტის დაფარვისთვის.
დასკვნის სახით, ანგარიშში ხაზგასმულია, რომ მიუხედავად იმისა, რომ საქართველომ გარკვეულ პოზიტიურ შედეგებს უკვე მიაღწია, ამ მიმართულებით გამოწვევები კვლავ არსებობს და ქვეყნისთვის მნიშვნელოვანია დამატებითი ნაბიჯების გადადგმა ტელეკომ ბაზარზე კონკურენციის გაძლიერების, ასევე, ინვესტიციებისა და ინოვაციების ზრდისთვის, რათა მომხმარებლებმა უფრო სწრაფი ინტერნეტის მიღება, შედარებით დაბალ ფასად შეძლონ.
