ჩვენ ვაკანსიების სერვისი გავუშვით: გამოაქვეყნეთ ვაკანსიები და მიიღეთ უკუკავშირი!
გივი ცერაძემსოფლიო
27 მარტი 2023, 17:23
2023-03-27
ბილ გეითსი: ხელოვნური ინტელექტის ხანა დაიწყო
GPT-4-ის უსაზღვრო შესაძლებლობებმა თითქმის ყველა დაარწმუნა, რომ მალე ჩვენი ცხოვრების სტილი, დამოკიდებულება, მიდგომები სამუდამოდ შეიცვლება. ამ ყველაფრის უკან კი, რა თქმა უნდა, ხელოვნური ინტელექტი დგას, რომელიც განვითარებას არ წყვეტს. ამ აზრს გიგანტი კომპანიის, Microsoft-ის დამფუძნებელი, ბილ გეითსიც იზიარებს, რომელმაც 21 მარტს შვიდგვერდიანი მოხსენება გამოაქვეყნა, რომელშიც ხელოვნურ ინტელექტსა და მის შესაძლებლობებზე დეტალურად საუბრობს. ორიგინალი ვერსია იხილეთ ბმულზე.
GPT-4-ის უსაზღვრო შესაძლებლობებმა თითქმის ყველა დაარწმუნა, რომ მალე ჩვენი ცხოვრების სტილი, დამოკიდებულება, მიდგომები სამუდამოდ შეიცვლება. ამ ყველაფრის უკან კი, რა თქმა უნდა, ხელოვნური ინტელექტი დგას, რომელიც განვითარებას არ წყვეტს. ამ აზრს გიგანტი კომპანიის, Microsoft-ის დამფუძნებელი, ბილ გეითსიც იზიარებს, რომელმაც 21 მარტს შვიდგვერდიანი მოხსენება გამოაქვეყნა, რომელშიც ხელოვნურ ინტელექტსა და მის შესაძლებლობებზე დეტალურად საუბრობს. ორიგინალი ვერსია იხილეთ ბმულზე.
ბილ გეითსის მხრიდან აზრის საჯაროდ გამოხატვა შემთხვევითი ან უმიზეზო არ ყოფილა. ბიზნესმენი OpenAI-ის მუშაობით აღფრთოვანებულია და მათ საქმიანობას რევოლუციურს უწოდებს. მისი თქმით, მსგავსი შეგრძნება პირველად 1980 წელს დაეუფლა, როდესაც პროგრამისტმა, ჩარლზ სიმონმა თანამედროვე გრაფიკული მომხმარებლის ინტერფეისი (GUI) პირველად გააცნო.
ბილ გეითსი
«ჩემს სიცოცხლეში ტექნოლოგიურ რევოლუციას 2-ჯერ მოვესწარი. პირველი 1980 წელს მოხდა, როცა Windows-მა და მომხმარებლის თანამედროვე ინტერფეისმა ჩვენი აზროვნება და მიდგომები შეცვალა. მეორე დიდი სიურპრიზი კი გასულ წელს OpenAI-ის გამოჩენა იყო, რომელსაც 2016 წლიდან ვაკვირდებოდი. მათმა სტაბილურმა პროგრესმა გამაკვირვა. მეგონა, რომ ამ ყველაფერს 3-4 წელს მოანდომებდნენ, თუმცა, რამდენიმე თვე დასჭირდათ».
ბილ გეითსი GPT ტექნოლოგიას პირველად 2022 წლის სექტემბერში გაეცნო, როდესაც OpenAI ჩათბოტს სცდიდა. როგორც წერს, სწორედ ამ დროს გააცნობიერა, რომ კაცობრიობა რაღაც მნიშვნელოვანისა და საინტერესოს წინაშე იდგა.
ბილ გეითსი
«აღფრთოვანებული ვუსმენდი, როგორ დაუსვეს AI-ს მოდელს AP Bio-ს გამოცდიდან 60 კითხვა, რომლიდანაც 59 სწორი აღმოჩნდა. მას შემდეგ, რაც ტექნოლოგიამ ტესტირება გაიარა, ჩვენ მას არამეცნიერული შეკითხვა დავუსვით. მან გააზრებული პასუხი დაწერა, რომელიც, ალბათ, იმაზე უკეთესი იყო, ვიდრე იქ მყოფი ადამიანები გავცემდით. ეს საოცარი გამოცდილება იყო. ამან შთამაგონა, მეფიქრა ყველაფერზე, რასაც ხელოვნური ინტელექტი მომდევნო 10 წლის განმავლობაში მიაღწევს».
ის ხელოვნური ინტელექტის გამოყენების რამდენიმე შესაძლო ვარიანტს გვთავაზობს. როგორც ქველმოქმედი, ფიქრობს, რომ AI-ის იმ დაავადებების შეჩერება შეუძლია, რომლითაც ყოველწლიურად 5 მილიონი ბავშვი იღუპება. იგი ხელოვნური ინტელექტის პოტენციალს უთანასწორობის შემცირებასა და გლობალურ გამოწვევებთან გამკლავებაშიც ხედავს, როგორიცაა განათლების გაუმჯობესება და კლიმატის ცვლილების მოგვარება.
ყველაფრის მიუხედავად, Microsoft-ის დამფუძნებელი, ხელოვნურ ინტელექტთან დაკავშირებულ გამოწვევებსა და სირთულეებს იაზრებს. თუმცა, AI-ის პოტენციალს მაინც პოზიტიურად უყურებს.
ბილ გეითსი
«კონფიდენციალურობა და მიკერძოება — ეს ის პრობლემა და გამოწვევაა, რომელსაც ხელოვნური ინტელექტზე დაფუძნებული ნებისმიერი პროდუქტი ებრძვის. თუმცა, მჯერა, რომ AI-ის უფრო მეტი სარგებლის მოტანა შეუძლია, ვიდრე ზიანის».
ამ ტექნოლოგიის პოტენციალი და გამოწვევები სრულად ვერც იქნება გამოკვლეული, სანამ ხალხი მის შესახებ ყველაფერს არ გაიგებს. ადამიანისთვის, რომელსაც გამოცდილება არც მანქანათმცოდნეობისა და არც კომპიუტერული მეცნიერების სფეროში არ აქვს, ხელოვნური ინტელექტი შეიძლება იდუმალი, დაუჯერებელი და ზოგჯერ საშინელიც კი იყოს.
ამ აზრს, ბილ გეითსიც იზიარებს, რომელიც ამბობს, რომ ადამიანების გარკვეულ ნაწილს ხელოვნური ინტელექტის შესახებ დამახინჯებული ინფორმაცია მხოლოდ პოპკულტურიდან აქვს.
ბილ გეითსი
«ფილმებში ხელოვნური ინტელექტი ხშირად ბოროტი და დაუნდობელია. მაგალითად, HAL 9000 სტენლი კუბრიკის „2001: კოსმოსური ოდისეა"-დან ან ალტრონი «შურისმაძიებლებიდან». საჭიროა, რომ ხალხს ხელოვნურ ინტელექტზე მეტი ინფორმაცია მივაწოდოთ».
მისი ხალხის რეაქცია დაახლოებით აღფრთოვანებისა და შიშის მიქსია, რაც კომენტარების კითხვისას და ე.წ. მიმების ყურებისას ნათელი ხდება. ბევრი ფიქრობს, რომ ეს ჩვენი მომავალია, ზოგი კი თვლის, რომ ეს დასასრულის დასაწყისია.
თავის მოხსენებაში ბილ გეითსი ხელოვნურ ინტელექტს მოდელს უწოდებს, რომელიც კონკრეტული ამოცანების ან სერვისებისთვის გამოიყენება. ის განმარტავს, თუ როგორ განსხვავდება ეს ხელოვნური ზოგადი ინტელექტისგან (AGI), რომელსაც დავალებების შესრულება და ყველაფრის ათვისება დამოუკიდებლად შეუძლია. AGI ჯერ არ არსებობს და მისი შექმნა ტექნოლოგიურ სამყაროში საკამათო თემად რჩება. ბილ გეითსი თითქოს ადამიანების დამშვიდებას ცდილობს. თუმცა, გარკვეულ ინტრიგასაც ტოვებს.
ბილ გეითსი
«აღფრთოვანებული ვარ, რამდენად სწრაფად შეუძლია ხელოვნურ ინტელექტს განვითარება. ცხადია, ეს AGI არ არის, რომელიც შეიძლება უდიდესი საფრთხეც კი იყოს კოციბრიობისთვის. თუმცა, იქნებ საზოგადოების გადაჭარბებული რეაქცია სულაც არ არის გადაჭარბებული».
ბილ გეითსს სურს, მკითხველმა ყურადღება ხელოვნური ინტელექტის დადებით ასპექტებზე გაამახვილოს, ამიტომ მისი წერილის კითხვისას მშვიდად და კომფორტულად ხარ. მას სჯერა, რომ ChatGPT-ს შეუძლია სამუშაოს ეფექტურობა ისეთ სფეროებში გააუმჯობესოს, სადაც უწყვეტი სწავლა გადამწყვეტი არ არის. მაგალითად, გაყიდვები, მომსახურება და დოკუმენტების დამუშავება.
ბილ გეითსი
«ვფიქრობ, რომ ხელოვნური ინტელექტი არა ჩვენი კონკურენტი, არამედ პარტნიორი გახდება, რომელიც საქმეს გაგვიმარტივებს. GPT-ის იდეების გამოხატვის უნარი დროთა განმავლობაში თეთრსაყელოიან მუშაკს დაემსგავსება, რომელიც სხვადასხვა ამოცანების შესრულებაში გეხმარებათ».
კიდევ ერთი სფერო, სადაც გეითსი ხელოვნური ინტელექტის საოცარ განვითარებას ვარაუდობს, ჯანდაცვაა. მისი ხედვით, AI ჯანდაცვის მუშაკების ეფექტურობას ზრდის, ამოცანების შესრულებაში ეხმარება და ინოვაციების განვითარებასაც უწყობს ხელს. ბილ გეითსი თვლის, რომ AI სამედიცინო მიღწევებს საგრძნობლად დააჩქარებს.
«ბიოლოგიაში მონაცემთა რაოდენობა ძალიან დიდია და პროფესიონალებისთვის ბიოლოგიური სისტემებისთვის თვალის დევნება, ფაქტობრივად, წარმოუდგენელია. უკვე არსებობს პროგრამული უზრუნველყოფა, რომელსაც შეუძლია, ეს მონაცემები ნახოს, გზები დაადგინოს, პათოგენებზე სამიზნეები მოძებნოს და წამლები შეიმუშაოს. ზოგიერთი კომპანია კიბოს წამლების განვითარებაზე მუშაობს, რომლებიც ამ გზით შეიქმნა». — წერს ბილ გეითსი
განათლების კუთხით, გეითსი პროგნოზირებს, რომ AI-ზე დაფუძნებული პროგრამული უზრუნველყოფა სწავლის პროცესის სრულ გარდაქმნას გამოიწვევს. მაგრამ აღნიშნავს, რომ ხელოვნური ინტელექტი მოსწავლისა და მასწავლებლის ურთიერთობის მნიშვნელობას ვერასდროს ჩაანაცვლებს.
ბილ გეითსი
«ტექნოლოგიების სრულყოფის შემდეგ, სწავლა მაინც მოსწავლეებსა და მასწავლებლებს შორის არსებულ ურთიერთობებზე იქნება დამოკიდებული. ხელოვნური ინტელექტი პროცესს გააძლიერებს, მაგრამ ვერასდროს ჩაანაცვლებ პროცესს, რომელსაც სტუდენტები და მასწავლებლები ერთად ასრულებენ».
როგორც უკვე ვთქვით, AI-ს ჯერ კიდევ აქვს პრობლემები და შეზღუდვები გადასალახი — ბილ გეითსი ამას აღიარებს. ჩათბოტებს ჰალუცინაციები აქვთ და კონტექსტს ხშირად დამახინჯებულად აღიქვამენ, აბსტრაქტული მსჯელობაც ახასიათებთ. ასევე კონფიდენციალურობის, მიკერძოების და თაღლითობის რისკები არსებობს, რაც მთავრობებსა და კერძო სექტორს შორის თანამშრომლობას მოითხოვს.
გეითსი ამ საშიშროებას აცნობიერებს და კითხვას სვამს — «შეიძლება თუ არა, მანქანამ გადაწყვიტოს, რომ ადამიანები მისთვის საფრთხეს წარმოადგენენ? დაასკვნას, რომ მისი ინტერესები განსხვავებულია და უბრალოდ ჩვენზე ზრუნვა შექვიტოს?».
პასუხს, ცხადია, თავადვე სცემს: «შესაძლოა, მაგრამ ეს პრობლემა დღეს აქტუალური არ არის. ხელოვნური ინტელექტის განვითარებამ დაგვანახა, რომ მსგავსი რეალობა ჯერ კიდევ შორსაა».
Microsoft-ის დამფუძნებელი თავის მოხსენებას საინტერესო მოსაზრებით ასრულებს იმის შესახებ, თუ როგორ იტვირთება ხელოვნური ინტელექტის ეპოქა როგორც შესაძლებლობებით, ასევე პასუხისმგებლობებით.
ბილ გეითსი
«გამიმართლა, რომ PC და ინტერნეტ რევოლუციაში ჩართული ვიყავი. ამით უბრალოდ აღფრთოვანებული ვარ. ამ ახალ ტექნოლოგიას შეუძლია ადამიანებს ცხოვრების გაუმჯობესებაში დაეხმაროს».
როგორ შეიძლება, ხელოვნურმა ინტელექტმა შეცვალოს LGBTQIA+ ადვოკატირება
ახალი AI Comes Out of the Closet — «AI კარადიდან გამოდის» სისტემა მიზნად ისახავს ხელოვნური ინტელექტისა და LGBTQIA+ მხარდაჭერის შერწყმას.
ავტორი: დევიდ სვინი, MIT
დღეს, 21 მაისს ევროპულმა საბჭომ მიიღო ხელოვნური ინტელექტის აქტი — კანონი, რომელიც «მიზნად ისახავს ხელოვნური ინტელექტის წესების ჰარმონიზაციას». ევროპული საბჭო აცხადებს, რომ აქტი მიჰყვება რისკებზე დაფუძნებულ მიდგომას — რაც უფრო მაღალია საზოგადოებისთვის ზიანის მიყენების რისკი, მით უფრო მკაცრია წესები. ეს არის პირველი კანონმდებლობა მსოფლიოში, რომელსაც შეუძლია, დააწესოს ხელოვნური ინტელექტის რეგულირების გლობალური სტანდარტი.
