საყიდლებზე წასვლა გჭირდებათ და ვერ ასწრებთ? მანქანაა გასარეცხი? იქნებ თეატრის ან კინოს ბილეთების ყიდვა გჭირდებათ და არ გცალიათ? სანტექნიკა გაგიფუჭდათ? — ყოველდღიური საქმეების შესრულებაში ქართული სტარტაპი, Wempler დაგეხმარებათ.
საყიდლებზე წასვლა გჭირდებათ და ვერ ასწრებთ? მანქანაა გასარეცხი? იქნებ თეატრის ან კინოს ბილეთების ყიდვა გჭირდებათ და არ გცალიათ? სანტექნიკა გაგიფუჭდათ? — ყოველდღიური საქმეების შესრულებაში ქართული სტარტაპი, Wempler დაგეხმარებათ.
ვემპლერი სანდრო თავხელიძემ, დავით ბერძნიშვილმა და გიორგი ჯავახიძემ 2022 წელს შექმნეს.
Wempler-ის საშუალებით, ადამიანებს თავადაც შეუძლიათ, სხვებს დაეხმარონ და ამით თანხა გამოიმუშაონ.
სანდრო თავხელიძე გვიყვება, რომ ვემპლერის იდეა დაახლოებით 1 წლის წინ დაიბადა — ის უნივერსიტეტის დავალებას აკეთებდა, როცა დედამ დაურეკა და სარემონტო მასალების ყიდვა სთხოვა. სანდრო ვერ ასწრებდა, ამიტომ ისეთი ადამიანის მოძებნა დაიწყო, ვინც ამას მის ნაცვლად გააკეთებდა. იმ მომენტში ასეთი ადამიანი ვერ იპოვა.
მოგვიანებით მეგობარმა უთხრა, რომ მას სურდა, თავად დახამრებოდა სხვას ანაზღაურების სანაცვლოდ.
ასე მიხვდნენ, რომ საერთო პრობლემა ჰქონდათ და ვემპლერის იდეაც დაიბადა.
ვემპლერმა კონკურს Shark Tenk Georgia-ში გაიმარჯვა, რის შემდეგაც 5 ინვესტორი მოიძიეს. დამფუძნებლებისთვის ეს პროდუქტის მალე შექმნის მოტივაცია გახდა.
დღეს ვემპლერს აპლიკაცია და ვებსაიტი აქვს. აპლიკაცია ერთი კვირის წინ გაუშვეს, ვებსაიტი კი — ორი თვის წინ. როგორც სანდრო ამბობს, ინვესტორები ფინანსებითა და რესურსებით დაეხმარნენ.
სანდროს თქმით, მომხმარებლებს თავიდან ვერ წარმოუდგენიათ, რომ შეიძლება ვიღაც დაიქირაო და ის, მაგალითად, სარემონტო მასალების საყიდლად შენ ნაცვლად წავიდეს.
«როცა იგებენ, რომ ეს შესაძლებელია, უკვირთ, შემდეგ კი ვემპლერის მუდმივი მომხმარებლები ხდებიან. ჩვენი მომხმარებლების 70% გვიბრუნდება და ვებგვერდზე კიდევ ერთხელ ათავსებს შეკვეთას».
სანდრო დამფუძნებლების შეცდომაზეც ლაპარაკობს — ეს პროდუქტის გვიან გაშვებაა. მისი თქმით, ეს კომპანიის დამფუძნებლების პერფექციონიზმის გამო მოხდა.
«გვინდოდა ვემპლერის პირველივე ვერსია ზუსტად ის გაგვეკეთებინა, რაც თავში გვქონდა. ეს იყო დიდი შეცდომა, რადგან ასე დრო იკარგება, ადამიანური და ფინანსური რესურსი მიდის. რა პროდუქტიც გავუშვით, ორ დღეში შეცვლა მოგვიწია. მომხმარებლისგან სულ სხვა უკუკავშირი წამოვიდა. ის, რაზეც გვეგონა, რომ საჭირო იყო მომხმარებლებისთვის საჭირო არ აღმოჩნდა». — ამბობს სანდრო თავხელიძე.
მას მიაჩნია, რომ სტარტაპებმა პროდუქტი რაც შეიძლება მალე უნდა გამოუშვან. მისი თქმით, პროდუქტის მალე გატანით მომხმარებლებისგანაც მალე წამოვა უკუკავშირი, რაც კომპანიის განვითარების მთავარი წყაროა.
დამფუძნებლები ვემპლერის საერთაშორისო ბაზარზე გატანასაც აპირებენ. პირველი ასეთი ბაზარი, საქართველოს შემდეგ, უზბეკეთი იქნება, სადაც პოტენციურ პარტნიორებთან მოლაპარაკებები უკვე დაწყებულია.
სანდროს თქმით, საქართველო სატესტო ბაზარია ყველა ტიპის მომხმარებლის მოთხოვნის გასათვალისწინებლად და კომფორტული აპლიკაციის ჩამოსაყალიბებლად.
