DG Systems ქართული აგრიტექ სტარტაპია, რომელიც სასათბურე ბიზნესებს დახურული გრუნტის ფართის 100%-ით ათვისებაში ეხმარება. კომპანიის მიერ შექმნილი სისტემები აგრობიზნესს საშუალებას აძლევს, მინიმალური საინვესტიციო დანახარჯების პირობებში გააორმაგოს მოსავლიანობა და ამასთან, გაანახევროს ნახშირწყალბადებზე დამოკიდებულება — DG Systems საკუთარ ინოვაციურ ტექნოლოგიებს ფლობს.
DG Systems-ის დამფუძნებლს, თორნიკე მჟავანაძეს წლებია პარტნიორთან — ლევან შანავასთან ერთად სამცხე-ჯავახეთში, სუბაპლურ ზონაში კენკრა მოჰყავს, მათი ბრენდი ცნობილი იყო «მწვანე რესპუბლიკის» სახელწოდებით.
კენკრის მაღალტექნოლოგიურ სათბურში მოყვანაზე ის მრავალი წელი ფიქრობდა, თუმცა, მაღალტექნოლოგიური სასათბურე სისტემების შექმნა ბევრ სირთულესთან აღმოჩნდა დაკავშირებული. ერთ-ერთი მათი მაღალი საინვესტიციო ფასი იყო.
«დავიწყე ფიქრი სუპერ ინტენსიურ სისტემებზე სასათბურე წარმოებაში. მაშინვე მოვიძიე ბაზარზე არსებული სისტემები — იყო ჰოლანდიური და ესპანური სისტემები. ძალიან მომეწონა, საკუთარი ბიზნესისთვის მჭირდებოდა. მაგრამ ძალიან ძვირი ჯდებოდა. საერთოდ დავკარგე ყველანაირი სისტემის ყიდვის სურვილი».
DG systemს-ის, როგორც სტარტაპის ჩამოყალიბების იდეა თორნიკე მჟავანაძეს 2021 წელს გაუჩნდა და აგროსისტემებზე საპატენტო განაცხადები 2022 წელს შეიტანა.
2022 წლიდანვე კომპანია აქტიურად ამოქმედდა.
«უკვე ორი პატენტი გვაქვს ორ თანამედროვე სისტემაზე სუპერ ინტენსიური წარმოებისათვის. სულ ოთხი მსგავსი სისტემაა ინდუსტრიული დანიშნულებისთვის, აქედან ორი ჩვენია, ორივე ქართული».
DG Systems-ის მიერ შემუშავებული სასათბურე სისტემა არის დინამიური პლატფორმა სხვადასხვა დაბალი და საშუალო ზომის კულტურების (მარწყვი, მწვანილი, სალათის ფოთოლი და ა.შ.) ინტენსიური ან სუპერ ინტენსიური წარმოებისთვის.
თორნიკე მჟავანაძე ამბობს, რომ DG Systems ამარტივებს მცირემიწიან რეგიონებში სასარგებლო ფართის მაქსიმალური პროდუქტიულობით ათვისებას. თუ კი ტრადიციული აგროტექნოლოგიების გამოყენების შემთხვევაში, აგრარულ ბიზნესს შეეძლო დაცული გრუნტის 50-70%-მდე ათვისება, ახალი ტექნოლოგიებით ის სრული ფართობის გამოყენებას შეძლებს.
სტარტაპის მომხმარებლები არიან სასათბურე ბიზნესით დაინტერესებული პირები, როგორც კერძო ინდივიდები, ასევე კომპანიები, მსხვილი საინდუსტრიო კომბინატები. DG Systems-ს აქვს ოფცია, რომლითაც მოყვარული მებაღეებისთვისაც ამზადებს პროდუქციას.
ეს არის ერთი კონკრეტული სექცია სისტემიდან, «რომელიც იმავე დანიშნულებით გამოიყენება და ავტონომიურადაც შეუძლია ფუნქციონირება».
რაც შეეხება ბიზნესის მოდელს, სტარტაპს აქვს B2B (ბიზნესიდან ბიზნესს), B2C (ბიზნესიდან მომხმარებელი) და B2G (ბიზნესიდან მთავრობას) მოდელები.
«სახელმწიფოებს შეუძლიათ, ლიცენზიები თანამშრომლობის კუთხით გამოიყენონ, შეიძინონ უფლებები ჩვენს პროდუქტზე და დაეხმარონ თავიანთ აგრობიზნესს, თავიანთ ქვეყნებში წარმოება უფრო ინტენსიური გახადონ». — ამბობს თორნიკე.
სტარტაპი ჯერ ისევ განვითარების პროცესშია და სხვადასხვა სირთულეს აწყდება. მათ შორის, თორნიკე მჟავანაძე სამეცნიერო აზრზე წვდომას და ფინანსურ შიმშილს გამოყოფს.
«სადღეისოდ გვაქვს MVP, მუშა პროტოტიპი, ტექნოლოგიური განვითარების (TRL) სადღაც მეხუთე საფეხურზე ვიმყოფებით ამ წუთისათვის და პირველი პროტოტიპის დამზადებამდე უკვე ბევრი სიახლე დაგვიგროვდა.
ფაქტობრივად, ერთ-ერთ გამოგონებაზე — უკვე მეორე პროტოტიპზე დავიწყეთ მუშაობა. საინჟინრო სამუშაოები თითქმის დასრულებულია და უფრო გვიჭირს სამეცნიერო კუთხით, სამეცნიერო აზრზე წვდომა ცოტა შეზღუდული გვაქვს საქართველოში. ამიტომ ვცდილობთ უცხოელ კონსულტანტებთან გვქონდეს კონტაქტი.
არ მინდა, მოვლენებს წინ გავუსწრო, მაგრამ შეიძლება რამდენიმე სამეცნიერო-კვლევითი ცენტრი ჩავრთოთ უცხოეთიდან ამ პროდუქტის განვითარებაში, რაც უფრო დააჩქარებს მის გატანას ბაზარზე და დროის მოკლე მონაკვეთში ალბათ შესაძლებელი იქნება მაქსიმალურად დახვეწილი პროდუქტი გავიტანოთ ბაზარზე.
ასევე, როგორც სტარტაპების უმრავლესობას, ფინანსური შიმშილი ჩვენთვისაც პრობლემაა. ვნახოთ, ჩართული ვართ რამდენიმე აქსელერაციის პროგრამაში საქართველოსა და ევროკავშირში, ასევე ვცდილობთ, რომ მოვიპოვოთ საგრანტო რესურსი და რაციონალურად გამოვიყენოთ ის. რაც ყველაზე სასიხარულოა გვყავს პირველი სპონსორი, რომლის წყალობითაც შევძლებთ უფრო სწრაფი განვითარების დინამიკა შევინარჩუნოთ. წინ დიდი გეგმები გვაქვს».
DG Systems-ის მიზანი მათ სლოგანს «We can change the game» ემთხვევა.
«ჩვენ გვაქვს ყველა ის პირობა, რომ ეს სლოგანი ჩვენს სეგმენტში რეალობად ვაქციოთ. ეს ძირითადი სფეროები აგრიტექი და გრინტექ მიმართულებაა».
სტარტაპმა 2022 წელს მოიპოვა გამარჯვება Startup Georgia-ს ორგანიზებულ აქსელერაციის პროგრამაში, ამავე წელს მიიღო საქართველოს ინოვაციებისა და ტექნოლოგიების სააგენტოდან ევროკავშირის დაფინანსება ინოვაციური მეწარმეობისათვის. ამასთან, იღებს მონაწილეობას Impact Hub Tbilisi აქსელერაციის პროგრამაში — Go Green გრინტექის მიმართულებით. დამატებით, DG Systems ჩაერთო ევროკავშირის ერთ-ერთ ქვეყანაში მიმდინარე აქსელერაციის პროგრამაში, რომელსაც Rubik Hub ახორციელებს და სადაც 33 ქვეყნის 180 სტარტაპიდან მხოლოდ 15 ქვეყანა და 24 სტარტაპი მოხვდა ფინალურ სტადიაზე.
«შევეცდებით, ქართული პროდუქტი ძალიან მალე გავიტანოთ ევროპის და აშშ-ს ბაზარზე». — გვეუბნება თორნიკე მჟავანაძე.
