ნინი ვანიშვილი ახალი ამბები 21 მარტი 2023, 20:00

Amazon-მა კიდევ 9 000 თანამშრომელი გაათავისუფლა

Amazon 9 000 თანამშრომელს ათავისუფლებს. შემცირება შეეხებათ AWS-ის, Twitch-ის, რეკლამის და ადამიანური რესურსების მიმართულებით მომუშავეებს.

კომენტარის დატოვება

Amazon-მა კიდევ 9 000 თანამშრომელი გაათავისუფლა

Amazon 9 000 თანამშრომელს ათავისუფლებს. შემცირება შეეხებათ AWS-ის, Twitch-ის, რეკლამის და ადამიანური რესურსების მიმართულებით მომუშავეებს.

გავრცელებულ განცხადებაში ამაზონის აღმასრულებელი დირექტორი, ენდი ჯასი შემცირების მიზეზად არასტაბილურ ეკონომიკას ასახელებს და ამბობს, რომ კომპანიამ აირჩია, ხარჯები დაეზოგა.

2022 წელს Amazon-მა 18 000 ადამიანი გაათავისუფლა.

«ჩვენი წლიური დაგეგმვის მთავარი პრინციპია, ვიყოთ უფრო დახვეწილნი, რათა კვლავ შევძლოთ მტკიცე ინვესტიციების ჩადება მომხმარებელთა ძირითად გრძელვადიან გამოცდილებაში. ამას, ჩვენი აზრით, შეუძლია, მნიშვნელოვნად გააუმჯობესოს მომხმარებელთა ცხოვრება და მთლიანად Amazon». — აცხადებს ენდი ჯასი.

თანამშრომელთა გათავისუფლებამდე რამდენიმე დღით ადრე ამაზონის სტრიმინგ პლატფორმა Twitch-ის აღმასრულებელმა დირექტორმა, ემეტ შირმა თანამდებობა დატოვა. თუმცა, გაურკვეველია დაკავშირებულია თუ არა ეს შემცირებებთან. ემეტ შირი კვლავ რჩება კომპანიაში მრჩევლის პოზიციაზე.

«ბევრი კომპანიის მსგავსად, ჩვენს ბიზნესზეც გავლენა იქონია მაკროეკონომიკურმა გარემომ. მომხმარებლების და შემოსავლების ზრდამ არ დააკმაყოფილა ჩვენი მოლოდინი. იმისთვის, რომ ბიზნესი მდგრად წარვმართოთ, მივიღეთ ძალიან რთული გადაწყვეტილება, შევამციროთ თანამშრომლების რაოდენობა» — წერს Twitch-ის ახალი CEO დენ კლანსი.

დეტალების დაზუსტებაზე Twitch-ის სპიკერმა სამანა ფატმა The Verge-სთან საუბრისას უარი თქვა.

განცხადების თანახმად, კომპანიაში ჯერ კიდევ არ მიუღიათ საბოლოო გადაწყვეტილება, კონკრეტულად რომელ თანამშრომლებს გაათავისუფლებენ. მათი მიზანია, ეს გადაწყვეტილებები თანამშრომლებს აპრილის ბოლოს აცნობონ.

დაზარალებული თანამშრომლები მიიღებენ თანამდებობიდან გათავისუფლების კომპენსაციას, ჯანმრთელობის დაზღვევას და სხვა სამუშაოს მოძებნისას მხარდაჭერას.

2022 წლის მეოთხე კვარტალი Amazon-ისთვის ყველაზე ცუდი კვარტალი იყო. კომპანიამ 2014 წლის შემდეგ პირველი წმინდა ზარალის, 2,7 მილიარდი აშშ დოლარის შესახებ გამოაცხადა.

ამაზონმა ბოლო თვეების განმავლობაში ხარჯების შემცირებისთვის რამდენიმე ნაბიჯი გადადგა, მათ შორის, შეაჩერა მეორე შტაბ-ბინის მშენებლობა ვირჯინიაში, დახურა ზოგიერთი მაღაზია და შეაჩერა Fresh მაღაზიების გაფართოება.

Amazon არ არის ერთადერთი მსხვილი კომპანია, რომელიც მძიმე ეკონომიკის პირობებში ებრძვის ფინანსურ საკითხებს და თანამდებობიდან გათავისუფლებას. Meta-მ, Microsoft-მა და Google-მა წელს უკვე გაათავისუფლეს ათიათასობით თანამშრომელი.