თუ შინაური ცხოველი უკვე დიდი ხანია გყავთ, ან ახლა აპირებთ ოთხფეხა მეგობრის სახლში მოყვანას, თქვენთვის კარგი ამბავი გვაქვს. სულ მალე ქართულ ბაზარზე ახალი სტარტაპი, ვიგლი გამოჩნდება, რომლის შემქმნელებიც თორნიკე ჩუნთიშვილი და ნათია ჩიქოვანი არიან.
თუ შინაური ცხოველი უკვე დიდი ხანია გყავთ, ან ახლა აპირებთ ოთხფეხა მეგობრის სახლში მოყვანას, თქვენთვის კარგი ამბავი გვაქვს. სულ მალე ქართულ ბაზარზე ახალი სტარტაპი, ვიგლი გამოჩნდება, რომლის შემქმნელებიც თორნიკე ჩუნთიშვილი და ნათია ჩიქოვანი არიან.
ვიგლი იქნება შინაური ცხოველების მეპატრონეების პირადი AI ასისტენტი, რომელიც 24/7-ზე შეძლებს მათთვის საჭირო ნებისმიერ კითხვაზე პასუხის გაცემას. ვიგლი ცხოველის ისტორიაზე და ინდივიდუალურ მახასიათებლებზე დაყრდნობით შეძლებს პერსონალიზებული კონსულტაციის გაწევას. მაგალითად, მას შეეძლება რჩევების მიცემა ცხოველის მოვლის ნებისმიერ საკითხზე, სიმპტომებისა და სხვა მონაცემების მიხედვით სავარაუდო დიაგნოზის დასმა, ნუტრიციოლოგიური რჩევების მიცემა, კვების გეგმის გაწერა, საჭიროების შემთხვევაში, შესაბამის სერვის პროვაიდერთან გადამისამართება და სხვა. ასევე, ვიგლის ექნება სხვა დამატებითი პროგრამული მახასიათებლებიც, რაც მომხმარებელს ცხოველის მოვლაში დაეხმარება.
როგორც თორნიკე ჩუნთიშვილი dev.ge-სთან ჰყვება, ვიგლის ყველაზე ფუნდამენტური კონცეფცია, რომ არსებობდეს AI ბოტი, რომელიც 24/7-ზე დააკვალიანებს, ასისტენტობას და პერსონალიზებულ კონსულტაციას გაუწევს შინაური ცხოველი პატრონს, იმისთვის, რომ მისმა ცხოველმა საუკეთესოდ იცხოვროს, სტარტაპის თანადამფუძნებელთან, ნათია ჩიქოვანთან საუბრისას გაჩნდა.
«ნათია ცხოველთა უფლებების აქტივისტია და ამ სფეროში ძალიან კარგად ჩახედული ადამიანია. ვსაუბრობდით პრობლემებზე ამ სფეროში, იმაზე, რომ ნებისმიერ ადამიანს, რომელსაც აჰყავს ცხოველი, აქვს მილიონობით კითხვა, რომელთა გარკვევას ხან ნაცნობებში და ხან ინტერნეტის მეშვეობით, როგორც წესი, ქაოტურად ცდილობს. პროცესში კი, ხშირად, მრავალ შეცდომას უშვებს. ასევე, პროფესიონალი ვეტერინარების სერვისი იშვიათი და საკმაოდ ძვირია, ნუტრიციოლოგის სერვისი კი, მაგალითად, საქართველოში, პრაქტიკულად, საერთოდ არ არსებობს».
როგორც თორნიკე ამბობს, უახლოეს პერიოდში ქართულ ბაზარზე პროდუქტის mvp-ის გაუშვებენ, რომლის ფარგლებშიც ვიგლის ექნება საბაზისო უნარები.
«ქართული ვერსია ეტაპობრივად განვითარდება, თუმცა ვფიქრობთ ქართული ვერსია ახლაც და მომავალშიც სრულიად უფასო იყოს მომხმარებლისთვის».
თორნიკე ჰყვება, რომ აპირებენ მუშაობის დაწყებას ინგლისურენოვან ვერსიაზეც გლობალ მარკეტისთვის, რაც, მისი თქმით, ამ პროდუქტის საბოლოო სახე იქნება.
«ვიგლი ხელმისაწვდომი იქნება ios და android აპლიკაციებზე, იქნება გაცილებით უფრო კომპლექსური AI, რომელიც პროაქტიულადაც შეძლებს მომხმარებელს შეახსენოს მნიშვნელოვანი საკითხები. ასევე, ამ ვერსიაში უკვე იქნება ინტეგრირებული სულ მცირე 2 დამატებითი ფუნქციაც. საბოლოო ვერსიის გამოშვების სავარაუდო დრო მაისია».
რაც შეეხება mvp-ის გაშვებას, ვიგლის შემქმნელები ამას 10 იანვარს გეგმავენ.
«ვფიქრობთ, mvp-ის გაშვება და უახლოესი 2 თვე კარგ გამოცდილებას, ახალი შესაძლებლობების თუ რისკების დანახვის საშუალებას მოგვცემს, რაც შესაბამისად აისახება კიდეც საბოლოო პროდუქტზე».
როგორც ვიგლის ერთ-ერთი დამფუძნებელი ამბობს, 2023 წლისთვის მათი მთავარი მიზანია, რაც შეიძლება დიდი და მრავალფეროვანი მომხმარებლების ბაზის შეგროვება.
«სწორედ ეს ბაზა და მომხმარებლის მიერ ვიგლისთან საუბრით გენერირებული data მოგვცემს ვიგლისვე უკეთ დატრენინგების და დროთა განმავლობაში პროდქტის ხარისხის უფრო და უფრო განვითარების შესაძლებლობას».
