ერთი წლის წინ Space International-მა საერთაშორისო ტექნოლოგიურ საკონსულტაციო კომპანია Thoughtworks-თან თანამშრომლობა დაიწყო. Thoughtworks-სთვის ეს რეგიონში პირველი პარტნიორობაა, შესაბამისად, ქართული ტექნოლოგიური სფეროსთვისაც — ძალიან მნიშვნელოვანი.
ერთი წლის წინ Space International-მა საერთაშორისო ტექნოლოგიურ საკონსულტაციო კომპანია Thoughtworks-თან თანამშრომლობა დაიწყო. Thoughtworks-სთვის ეს რეგიონში პირველი პარტნიორობაა, შესაბამისად, ქართული ტექნოლოგიური სფეროსთვისაც — ძალიან მნიშვნელოვანი.
Thoughtworks საერთაშორისო ტექნოლოგიური და საკონსულტაციო კომპანიაა, რომელიც ახალი ტექ. გადაწყვეტებით ორგანიზაციებში ცვლის არსებულ ხედვებს, პროცესებს ტექნოლოგიური პროდუქტის შექმნისას და ამკვიდრებს ისეთ სტანდარტებს, რომელიც მომხმარებლისთვის საუკეთესო გამოცდილების მომტანია.
Space International-ისთვის მნიშვნელოვანია, რომ ტექნოლოგიურ რესურებსა და ცოდნას ისეთი კომპანიისგან იღებს, რომლის მთავარი პარტნიორებიც Microsoft, AWS (Amazon Web Services), Google Cloud და სფეროს სხვა დიდი და ცენტრალური მოთამაშეები არიან.
dev.ge-სთან Space International-ის პროდუქტებისა და ტექნოლოგიების დირექტორმა, გიორგი კაპანაძემ და ბექენდ, ვებ და პროგრამული უზრუნველყოფის არქიტექტურის დივიზიის ლიდმა, გიორგი ჟორჟოლიანმა კომპანიებს შორის 1-წლიანი პარტნიორობა შეაფასეს, ამასთან, მიღწეულ შედეგებზე, ორგანიზაციაში განხორციელებულ ცვლილებებსა და სამომავლო გეგმებზე ისაუბრეს.
Space International-ში ტექნოლოგიური ტრანსფორმაცია წარმატებით მიმდინარეობს, რომლის მთავარ ვექტორადაც Space Int.-მა ტექნოლოგიური პროდუქტების შიდა დეველოპმენტი აირჩია.
გიორგი ჟორჟოლიანი ამბობს, რომ Thoughtworks-თან პარტნიორობის პირველი და ყველაზე მნიშვნელოვანი ასპექტი პროცესების კიდევ უფრო აჩქარება და შეცდომების მინიმუმამდე შემცირება იყო, რაც კომპანიას წარმატებით გამოუვიდა.
«პარტნიორობის მთავარი მამოძრავებელი ჩვენი ელვისებური ზრდა იყო — სწრაფი ზრდის პროცესში შეცდომების დაშვება და თანამედროვე ტექნოლოგიებიდან და მოდგომებიდან გადახვევა მარტივია. Thoughtworks-სთან თანამშრომლობა სწორედ იმიტომ დავიწყეთ, რომ სწრაფი ზრდის პირობებში, ბიზნესის კუთხით ეფექტიანობა შეგვენარჩუნებინა».
გიორგი კაპანაძის თქმით, Thoughtworks-თან პარტნიორობას რამდენიმე ძირითადი მიზეზი აქვს, რომლებიც თანაბრად მნიშვნელოვანია. Space International-ში გარდაქმნა სამი მიმართულებით მიმდინარეობს — გიორგის თქმით, კომპანია ორგანიზაციულ, ტექნოლოგიურ და პროცესების მოდერნიზაციას ერთმანეთის პარალელურად ცდილობს.
«ორგანიზაციაში სრულიად ახალი პრაქტიკები ინერგება: მაგალითად, იცვლება ტექნოლოგიური არქიტექტურა, ინერგება ინჟინრული კულტურა გუნდებში, ხდება გუნდების რეორგანიზაცია და ახალი პრაქტიკების დანერგვა, იცვლება ინფრასტრუქტურა, უმჯობესდება უსაფრთხოება და რაც მთავარია, უფრო სწრაფები და მოქნილები ვხდებით».
გიორგი კაპანაძე Thoughtworks-სთან თანამშრომლობის ერთ წელს დადებითად აფასებს და იმ მნიშვნელოვან ცვლილებებზე საუბრობს, რომლებიც Space-ში 2023 წელს შემუშავდა. მისი თქმით, კომპანიაში სრულიად ახალი მიდგომებია დანერგილი — თუ აქამდე კონკრეტული სისტემისა თუ სერვისის გაშვებას 1 თვე სჭირდებოდა, ახლა ეს მაჩვენებელი 1-2 დღემდეა დაყვანილი.
«ორგანიზაციის შიგნით და მის გარეთ მიმდინარე პროცესები აჩქარებულია — თუ აქამდე ამა თუ იმ სერვისის დანერგვას 1 საათი სჭირდებოდა, ახლა ეს რამდენიმე წუთში ხდება. ასევე, ინფრასტრუქტურული რესურსების კუთხით მდგომარეობა საგრძნობლად გაუმჯობესდა — თუ აქამდე არასტაბილურ ვერსიას ვნერგავდით, უკან, სტაბილურ ვერსიაზე დაბრუნება არ შეგვეძლო.
ახლა კი ეს მარტივად, რამდენიმე წუთში შეგვიძლია. აქამდე ინფრასტრუქტურის გაზრდა «ხელით», მანუალურად ხდებოდა, რაც საბოლოო ჯამში მომხმარებელსა და სისტემის გამტარუნარიანობაზე უარყოფით გავლენას ახდენდა — დღეს ეს პროცესი სრულად ავტომატიზებულია».
გიორგი კაპანაძის შეფასებით, Thoughtworks-თან პარტნიორობის მნიშვნელოვანი ასპექტი ისიც არის, რომ Space International-ის თანამშრომლები მათთან ერთად რამდენიმე პროექტში მონაწილეობენ, რაც მათ ცოდნისა და გამოცდილების კიდევ უფრო გაღრმავებაში ეხმარებათ.
მსოფლიოში უამრავი საკონსულტაციო კომპანია არსებობს. Space International-ს Thoughtworks სხვებისგან შემთხვევით არ შეურჩევია. როგორც ამბობენ, მნიშვნელოვანია, რომ სფეისში პროცესის წარმართვას კომპანიები ერთად ცდილობენ, რაც Thoughtworks-ს სხვა ტექნოლოგიური საკონსულტაციო ფირმებისგან გამოარჩევს.
კერძოდ, Thoughtworks-ის წარმომადგენლები Space-ის თანამშრომლებს მხოლოდ რჩევებით არ ამარაგებენ — ისინი უშუალოდ არიან ჩართულნი მუშაობაში. პროცესებს ორივე კომპანიის გუნდი ერთად, თანამშრომლობით წარმართავს. როდესაც კონკრეტული გუნდი თავის მისიას აღწევს, იშლება და წევრები ახალ გუნდებს უერთდებიან, რათა იგივე პროცესი სხვა გუნდშიც დაიწყოს.
გიორგი კაპანაძის თქმით, Space International-ს სურს, Thoughtworks-თან თანამშრომლობა 2024 წელსაც გაგრძელდეს. 2023 წელს მოდერნიზაციაში Space International-ის ყველა გუნდი ჩართული არ ყოფილა. ამიტომ, კომპანია გეგმავს, მომავალ წელს პროცესმა ყველა მათგანი მოიცვას.
