ბოლო რამდენიმე წლის განმავლობაში საქართველოში არაერთმა საერთაშორისო კომპანიამ გახსნა ოფისი, მათ შორის არიან Viber, EPAM, Exadel და სხვები.
Dev.ge დაინტერესდა, რატომ შემოვიდნენ ისინი საქართველოში, ჰყავთ თუ არა ადგილობრივი თანამშრომლები და რა გეგმები აქვთ სამომავლოდ.
ბოლო რამდენიმე წლის განმავლობაში საქართველოში არაერთმა საერთაშორისო კომპანიამ გახსნა ოფისი, მათ შორის არიან Viber, EPAM, Exadel და სხვები.
Dev.ge დაინტერესდა, რატომ შემოვიდნენ ისინი საქართველოში, ჰყავთ თუ არა ადგილობრივი თანამშრომლები და რა გეგმები აქვთ სამომავლოდ.
სამივე კომპანიის წარმომადგენელი ერთ-ერთ მთავარ მიზეზად ტექნოლოგიური კომპანიებისთვის არსებულ საგადასახადო შეღავათებს ასახელებს. კანონმდებლობის მიხედვით, საერთაშორისო კომპანია მოგების გადასახადის 15%-ისა და საშემოსავლო გადასახადის 20%-ის ნაცვლად, იხდის მხოლოდ 5%-ს.
Exadel საერთაშორისო IT კომპანიაა და ავითარებს ინოვაციურ პროგრამულ უზრუნველყოფას, ასევე მობილურ და ვებ აპლიკაციებს. საერთო ჯამში, აქვს 30-ზე მეტი ოფისი 16 ქვეყანაში. ექსადელი მოიცავს თითქმის ყველა ინდუსტრიას: საბანკო სფეროს, ფინანსებს, განათლებას, ჯანდაცვას, ელექტრონულ კომერციას, ლოჯისტიკას და ა.შ., ასევე ტექნიკურ სფეროებს: ვებ-განვითარება, ხელოვნური ინტელექტი და სხვა.
«საქართველომ შექმნა ხელსაყრელი გარემო, რომ ჩვენი წვლილი შევიტანოთ ადგილობრივი IT-ის შემდგომ სწრაფ განვითარებაში. ადგილობრივი ბაზარი ადამიანური რესურსების მხრივ ჯერ-ჯერობით მცირეა და ისეთი კადრების გაზრდას, რომლებსაც შეუძლიათ შეუერთდნენ გლობალურ პროექტებს, დრო სჭირდება. ჩვენი მიზანიც სწორედ ის არის, რომ სხვადასხვა სასწავლო პროგრამით ნიჭიერ პროფესიონალებს მივცეთ საშუალება, გახდნენ უფრო მეტად კონკურენტუნარიანები საერთაშორისო ბაზარზე», — გვითხრეს ექსადელში.
კომპანიამ თბილისის ოფისის კარი წელიწად ნახევრის წინ გააღო და ამ დროისთვის 300-ზე მეტი ადგილობრივი IT პროფესიონალი ჰყავს დასაქმებული.
«ექსადელმა წელიწად-ნახევრის წინ ოპერირება მხოლოდ 2 ადამიანით დაიწყო: დირექტორი და ბუღალტერი. ამასობაში, გუნდს შეუერთდა მენეჯმენტის რამდენიმე თანამშრომელი და 10-მდე დეველოპერი. კომპანია იმდენად სწრაფად განვითარდა, რომ 2021 წლისთვის 80-მდე IT პროფესიონალი შემოუერთდა გუნდს. ახლა კი, Exadel Georgia ამაყობს 300 თანამშრომლით და ეს მხოლოდ დასაწყისია. თბილისის ოფისის გარდა, გავხსენით coworking-ის სივრცე ბათუმში», — გვიყვებიან ექსადელში.
კომპანიაში ამბობენ იმასაც, რომ საქართველომ უკვე აჩვენა თავისი პოტენციალი ნიჭიერი და მოტივირებული IT დეველოპერების სიმრავლით, რომლებიც, მათი თქმით, ძალიან მალე ქვეყანას რეგიონის მთავარ IT ცენტრად აქცევენ.
მიმოწერითი და ხმოვანი კომუნიკაციის მიმართულებით მომუშავე საერთაშორისო კომპანია Viber მსოფლიოს გარშემო 190-ზე მეტ ქვეყანაში ოპერირებს. ვაიბერი პოპულარულია საქართელოშიც და დარეგისტრირებულ მომხმარებელთა რაოდენობა, 1.7 მილიონია. როგორც კომპანიაში ამბობენ, თბილისში ოფისი უკვე შვიდი თვეა აქვთ და მათი მთავარი მიზანია, კიდევ უფრო გაამყარონ საკუთარი პოზიციები საქართველოში.
«ჩვენ ახლა თბილისში გვყავს სუპერ პროფესიონალების გუნდი, რომლებიც სხვადასხვა მიმართულებებით მუშაობენ, მათ შორის პრიორიტეტული კი პროგრამული ხარისხის უზრუნველყოფაა iOS და Android მოწყობილობებზე», — ამბობენ კომპანიაში.
საქართველოში უკვე მეორე წელია ოპერირებს EPAM, რომელიც პროგრამული ინჟინერიის უმსხვილესი ამერიკული IT კომპანიაა. ის მთელი მსოფლიოს მასშტაბით მომხმარებელს 50-ზე მეტ ქვეყანაში ემსახურება. ეპამი პარტნიორებს პროგრამული უზრუნველყოფის სერვისს სთავაზობს. როგორც dev.ge-სთან კომპანიის წარმომადგენლები ამბობენ, ეს ორი წელი სრულიად საკმარისი იყო იმისათვის, რომ გუნდი პროფესიონალურად გაზრდილიყო IT-ის ყველა მიმართულებით. მათი თქმით, თანამშრომლების რაოდენობა ცვალებადია, თუმცა ამ ეტაპზე 1000-ზე მეტი ადამიანი ჰყავთ დასაქმებული.
«ბევრი ქართველი სპეციალისტი, რომელიც უცხოეთში მუშაობდა, საქართველოში დაბრუნდა, რადგან ახლა, ჩვენი დახმარებით, მათ აქვთ შესაძლებლობა იმუშაონ გლობალურ კომპანიებთან ისე, რომ ქვეყნიდან წასვლა არ მოუწიოთ. ჩვენი მოქნილი დისტანციური მუშაობის პოლიტიკა აძლევს ჩვენს თანამშრომლებს შესაძლებლობას, იმუშაონ ქვეყნის ნებისმიერი კუთხიდან», — ამბობენ კომპანიაში.
სამომავლო გეგმებთან დაკავშირებით, სამივე კომპანიაში ამბობენ, რომ მთავარი მიზანი ადგილობრივი IT სექტორის იმ დონეზე განვითარებაა, რომ მათ შეძლონ გლობალურ ბაზარზე საკუთარი შესაძლებლობების გატანა და ნებისმიერი ქვეყნის სპეციალისტებისთვის კონკურენციის გაწევა. IT სექტორის განვითარებისთვის EPAM-მა უფასო სასწავლო კურსიც შექმნა.
«გასული წლის განმავლობაში 100-მა სტუდენტმა დაამთავრა ჩვენი სასწავლო ცენტრი და შეუერთდა ადგილობრივ IT სამუშაო გარემოს. ჩვენი ინიციატივების ფარგლებში მხარი დავუჭირეთ რამდენიმე საგანმანათლებლო პროექტს, როგორიცაა მასწავლებელთა ეროვნული ჯილდო და საჯარო სკოლებში რობოტიკის კლუბების შექმნა. ჩვენ ვგეგმავთ გავაგრძელოთ საზოგადოებისთვის ჩვენი ცოდნისა და გამოცდილების გაზიარება», — ამბობენ კომპანიაში.
Viber-ში კი აღნიშნავენ, რომ საქართველოსთან დაკავშირებით რამდენიმე გეგმა აქვთ და მათ შორის არის ტექნოლოგიების სფეროს გაძლიერება, ასევე, სხვა კომპანიებთან თანამშრომლობა, რომლებთან ერთად შეძლებენ შექმნან «ინოვაციური და უნიკალური პროექტები».
