«რიპლის» ვიცე-პრეზიდენტმა, ჯეიმს უოლისმა BMG-სთან ინტერვიუში ისაუბრა ციფრული ლარის დანერგვის გეგმაზე, რომელიც 2 ფაზას მოიცავს. შედეგად, საპილოტე პროექტი 7-8 თვეში უნდა დაიწყოს.
«რიპლის» ვიცე-პრეზიდენტმა, ჯეიმს უოლისმა BMG-სთან ინტერვიუში ისაუბრა ციფრული ლარის დანერგვის გეგმაზე, რომელიც 2 ფაზას მოიცავს. შედეგად, საპილოტე პროექტი 7-8 თვეში უნდა დაიწყოს.
ინფორმაცია, რომ ციფრული ლარის საპილოტე პროექტის გამარჯვებული კომპანია Ripple გახდა, საქართველოს ეროვნულმა ბანკმა 2023 წლის ნოემბერში გაავრცელა, ხოლო უშუალოდ ციფრულ ვალუტაზე მუშაობა სებ-მა 2020 წელს დაიწყო. გასული წლის ივლისში უწყებამ განაცხადა, რომ ის ცდილობს, მსოფლიოს რამდენიმე ქვეყანაში უკვე არსებული პრაქტიკა საქართველოშიც დაამკვიდროს.
ცენტრალური ბანკის ციფრული ვალუტები (CBDC) ქვეყნების მიერ გამოშვებული ვალუტის ციფრული ფორმაა და არ არის მიბმული ფიზიკურ საქონელთან.
«რიპლის» ვიცე-პრეზიდენტმა, ჯეიმს უოლისმა BMG-სთან თქვა, რომ პირველი ფაზა ზოგადი პროგრამისთვის საბოლოო სახის მიცემა და დეტალების შემუშავებაა, მეორე კი — საპოლოტე პროექტის უშუალოდ დაწყებას გულისხმობს.
«პირველი ფაზა, რეალურად, ახლა იწყება. ვგულისხმობ გამოყენების ახლებური ქეისების განხილვას, იქნება ეს ობლიგაციების ტოკენიზაცია თუ სხვა. ეს დაგეგმარების ფაზაა, რომელიც, სავარაუდოდ, წლის შუა პერიოდამდე გაგრძელდება.
7-8 თვის გასვლის შემდეგ კი გადავდივართ უკვე მეორე ფაზაში, როცა რეალურად დავიწყებთ პილოტის განხორციელებას». — თქვა მან.
უოლისის განცხადებით, 2025 წლის შუა პერიოდიდან კი, საპილოტე ფაზის დასრულების შემდეგ, ეროვნულ ბანკს მოუწევს გადაწყვიტოს, რა იქნება შემდეგი ნაბიჯი.
«თუ სურთ გამოყენების ქეისების კიდევ უფრო გამრავალფეროვნება, «რიპლის» როლი, როგორც ტექნოლოგიური პარტნიორის, ჩვენი გამოცდილების გაზიარებით, გაგრძელდება.
ეროვნულ ბანკთან მარდად ვმუშაობთ, ერთად ვიკვლევთ ყველაფერს, რაც გზად გვხვდება. თუმცა ესაა ზოგადი მოცემულობა — შემდეგი რამდენიმე თვე ვგეგმავთ და 7-8 თვეში ვიწყებთ პილოტს». — ამბობს ჯეიმს უოლისი BMG-სთან.
CBDC არის ციფრული ვალუტა, რომელიც გამოშვებულია ცენტრალური ბანკების მიერ. მათი ღირებულება დაკავშირებულია გამომშვები ქვეყნის ოფიციალურ ვალუტასთან.
CBDC ჰგავს, მაგრამ არ არის იგივე, რაც სტაბილკოინი. სტაბილკოინი არის კერძო, სტაბილიზებული კრიპტოვალუტის სპეციფიკური ტიპი, რომელიც დაკავშირებულია სხვა ვალუტასთან, საქონელთან ან ფინანსურ ინსტრუმენტთან, რათა დროთა განმავლობაში შეინარჩუნოს შედარებით სტაბილური ღირებულება. კრიპტოვალუტებისგან განსხვავებით, რომლებიც დეცენტრალიზებულია, CBDC-ს სახელმწიფო უშვებს და ოპერირებას უზრუნველყოფს.
CBDC ყველა ქვეყანაში, სადაც მის დანერგვას ცდილობენ, სხვადასხვანაირად მუშაობს.
დღესდღეობით მსოფლიოს 87 ქვეყანა მუშაობს CBDC-ზე. მათ შორის არის საქართველოც.
