პროგრამირება ბავშვებისთვის - BitCamp-ის ახალი ჩანაფიქრი
BitCamp 2023 წლიდან პროგრამირების სფეროში ბავშვების განვითარებაზე იზრუნებს და მათ სხვადასხვა სასწავლო კურსებით უზრუნველყოფს.
BitCamp 2023 წლიდან პროგრამირების სფეროში ბავშვების განვითარებაზე იზრუნებს და მათ სხვადასხვა სასწავლო კურსებით უზრუნველყოფს.
BitCampKids BitCamp-ის დამფუძნებლისა და ხელმძღვანელის, ოთო ზაკალაშვილის ახალი იდეაა. ის სკოლის მოსწავლეებისთვის პროგრამირების სასწავლო პროგრამის შედგენას გეგმავს.
პროგრამა იმ მშობლებისთვის და მასწავლებლებისთვის იქნება, ვინც დაინტერესდება, ბავშვებს პროგრამირება თავად ასწავლოს.
ოთო ზაკალაშვილი ამბობს, რომ ხშირად არის შემთხვევა, როცა მშობელი და ბავშვი სასწავლო კურსებს ერთად გადიან და თუ ამას სერვისის სახე მიეცემა და კიდევ უფრო დაიხვეწება, ყველასთვის უკეთესი იქნება.
«მშობლებმა, რომლებსაც მოეწონათ პროგრამა თავისთვის, ასევე გადაწყვიტეს პროგრამირება შვილებისთვისაც შეესწავლათ. ჩვენი საბოლოო სამიზნე მაინც მშობელია, რომელიც იღებს გადაწყვეტილებას, სურს თავად აიღოს სამენტორო პროგრამა თუ უნდა მიიყვანოს შვილი იმ მენტორთან, რომელიც ჩვენ მიერ იქნება გადამზადებული». — ამბობს ოთო ზაკალაშვილი.
პროგრამის დასაძლევად, მასწავლებლებისა და მშობლებისთვის ვიდეო ლექციები ჩაიწერება და ასევე სამენტორო სივრცეც გაიხსნება, სადაც მასწავლებლებს BitCamp-ისვე მომზადებული პროფესიონალები უმენტორებენ და გადაამზადებენ.
ზაკალაშვილი ამბობს, რომ სიახლე საქართველოში ხელს არა მხოლოდ პროგრამირების განვითარებას შეუწყობს, არამედ სხვა სფეროებშიც მნიშვნელოვნად შეცვლის ზოგად სურათს.
«ზრდასრულებს შეიძლება უკვე ჰქონდეთ პროფესიული ინტერესები. სკოლის მოსწავლეების შემთხვევაში ასე არ არის. მათ აქვთ სუფთა, კეთილშობილი ცნობისმოყვაერეობა. შეუძლიათ პროგრამირება იმისთვის კი არ ისწავლონ რომ პროგრამისტები გახდნენ, არამედ პრობლემის გადაჭრის ერთ-ერთი იარაღის გამოყენებას დაეუფლონ. ჩვენ კი მივიღებთ ისეთ თაობას, რომელიც გაცილებით მეტს შეძლებს არა მხოლოდ პროგრამირებაში, არამედ ბევრ სხვა სფეროში».
ოთო ზაკალაშვილი ამბობს, რომ საპილოტედ რამდენიმე სკოლა და უკვე შერჩეულია და მათი ხელმძღვანელები ძალიან დაინტერესებულნი არიან.
საწყის ეტაპზე, საპილოტე რეჟიმში ყველაფერი უფასო იქნება, თუმცა BitCamp-ის დამფუძნებელს სურს, რომ მომავალში ამან სერვისის სახე მიიღოს.
«ჩვეულებრივი სასწავლო გეგმა, ჩემი ჩაწერელი სასწავლო ვიდეოები და მენტორშიპი თავდაპირველად, საპილოტე რეჟიმში უფასო იქნება, მაგრამ ჩვენ გვსურს ამას პლატფორმის სახე მივცეთ და მასწავლებლებს დაბალ ფასად სერვისი შევთავაზოთ, რაშიც შევა, მაგალითად, მენტორშიპი, ბავშვებთან ურთიერთობისთვის საკომუნიკაციო იარაღი და ბავშვების მონაცემთა ბაზის მენეჯმენტი». — განაცხადა ოთო ზაკალაშვილმა.
BitCamp ყველა კურსს ხელმისაწვდომს გახდის
BitCamp ყველა კურსს ხელმისაწვდომს გახდის
