მარია წულუკიძის ძალისხმევა აჭარაში მცხოვრებთა IT განათლებისთვის
30 წლის მარია წულუკიძე ქობულეთსა და ბათუმში ვებ ტექნოლოგიებს ასწავლის. ქალმა, რომელმაც IT განათლება ესტონეთში მიიღო, მშობლიურ ქალაქში დაბრუნება და ადგილობრივების დახმარება აირჩია.
30 წლის მარია წულუკიძე ქობულეთსა და ბათუმში ვებ ტექნოლოგიებს ასწავლის. ქალმა, რომელმაც IT განათლება ესტონეთში მიიღო, მშობლიურ ქალაქში დაბრუნება და ადგილობრივების დახმარება აირჩია.
მარია უკვე 11 წელია, განათლების სფეროში მუშაობს. ახლა ვებ ტექნოლოგიებს ქობულეთისა და ბათუმის კოლეჯებში და ბათუმის ნავიგაციის უნივერსიტეტში ასწავლის, ასევე, უძღვება საავტორო კურსებს. ზოგ შემთხვევაში კი საერთაშორისო პროექტებშიც ერთვება და მათზე თავის სტუდენტებთან ერთად მუშაობს.
ბათუმის უნივერსიტეტში მარია კომპიუტერული მეცნიერების ფაკულტეტის სტუდენტებს ასწავლის. ხოლო პროფესიულ კოლეჯებში, სადაც სწავლა უფასოა, კურსებს ვებ ტექნოლოგიების თავისივე შექმნილი კურიკულუმით უძღვება.
ამ სასწავლებლებში მოხვედრა მე-9 კლასის და უფროსი ასაკის ნებისმიერ ადამიანს შეუძლია.
კოლეჯში სწავლება საბაზისო დონეს მოიცავს. თუმცა, მარია ცდილობს, თავის სტუდენტებს უფრო მეტი ასწავლოს, რადგან მიიჩნევს რომ ეს აუცილებელია.
«ჩემ დროს ეს პროგრამა შესაბამის დონეზე არ ისწავლებოდა და ყველაფრის სწავლა ჩემით მომიწია. ახლა მე ვცდილობ, ჩემს მოსწავლეებს მივცე ის ცოდნა და ყურადღება, რაც მე მაკლდა».
ტექნოლოგიებით მარია ბავშვობიდან დაინტერესდა და ეს ინტერესი არასდროს დაუკარგავს. როგორც გვეუბნება, სხვების მენტორობის პარალელურად სწავლას დღემდე აგრძელებს — ახლა მისი ინტერესის სფერო ხელოვნური ინტელექტია.
«თუ სწავლას დავამთავრებ, მაშინ დავამთავრებ ჩემს საქმიანობასაც, იმიტომ, რომ ბაზარი მზარდი და ცვალებადია. ყოველთვის რაღაც ახალი ხდება და სფეროს ირგვლივ მინიმუმ კითხვებს მაინც უნდა ვპასუხობდე».
მარია გვიყვება, რომ ტექნოლოგიების ესტონეთში შესწავლის შემდეგ დასაქმების კუთხით არაერთი შეთავაზება ჰქონდა, მაგრამ მან მშობლიურ რეგიონში დაბრუნება და ახალგაზრდებისთვის ცოდნის გაზიარება არჩია.
მისი თქმით, რეგიონებში ახალგაზრდებს არ აქვთ მხარდაჭერა და შესაძლებლობა, ისწავლო. არ ჰყავთ ადამიანი, რომელიც გზის გაკვლევაში დაეხმარება. ამიტომაც, მისი სურვილი და გეგმა ამ ახალგაზრდების დახმარებაა.
შესაძლებლობა, ცხოვრება და მუშაობა დედაქალაქში გააგრძელოს, მარიას არაერთხელ მიეცა. თუმცა, ყოველთვის უარი თქვა, დატოვოს ის, რასაც მრავალი წელია, აშენებს.
მარია წულუკიძე ქალია ტექნოლოგიებში — სფეროში, სადაც ჯერაც კაცები დომინირებენ. ამიტომ, ქალები ხშირად ხდებიან სტერეოტიპების მსხვერპლები. რეგიონში ვითარება კიდევ უფრო რთულდება.
მარია ამბობს, რომ აჭარაში კომპიუტერული მეცნიერებების შესწავლა ბევრ ქალს უნდა, მაგრამ, ხშირ შემთხვევაში, ოჯახი წინააღმდეგობას უწევს.
«ჩემი სტუდენტებიც არიან გენდერული სტერეოტიპების მსხვერპლნი, ხშირად მოდიან ჩემთან და მეუბნებიან, რომ სამსახურში არ აჰყავთ იმის გამო, რომ კანდიდატი კაციცაა და მასზე უკეთ შენი საქმე ვერ გეცოდინებაო»
ზოგჯერ ქალები ოჯახში მალავენ, რომ ტრენინგს დაესწრნენ.
«ერთ-ერთი პროექტის დროს ქალმა მთხოვა, მისი ფოტო არ ამეტვირთა, რადგან ქმარმა არ იცოდა, რომ ტრენინგზე იყო. ჩემთვის ეს შოკისმომგვრელი იყო — ამ ქალმა ცოდნა მიიღო, მაგრამ სახლში ვერ ამბობდა»
2023 წელს მარიამ შექმნა ბანაკი «აიგოგო», რომელშიც აჭარაში მყოფი ქალები ჩაერთნენ, ბანაკი სამეტაპიანი იყო და 90 ქალის გადამზადება მოხდა.
კურსი უფასო იყო. მონაწილეები პროგრამირების საფუძვლებს დაეუფლნენ. ბანაკში მონაწილეობდნენ ქალები მაღალმთიანი აჭარიდანაც, რომლებსაც აქამდე შესაძლებლობა არ ჰქონდათ, რომ მათთვის საინტერესო საქმიანობა შეესწავლათ.
მარია წულუკიძის თქმით, რეგიონებში ერთ-ერთი დიდი პრობლემა IT კომპანიების ნაკლებობა და სამუშაო ადგილების სიმცირეა, შესაბამისად, სტუდენტის დასაქმება — ძალიან რთული.
«ასევე, დამსაქმებლებსაც არ აქვთ გათვითცნობიერებული, რომ პროგრამისტი არ არის „აიტიშნიკი“ და მისი მოვალეობა ვინდოუსის გადაყენება არაა. ყოველდღიურად მიწევს ბრძოლა, რომ ვიპოვო შესაბამისი კომპანიები. საბოლოოდ მაინც საქმდებიან ეს ადამიანები, მაგრამ ჩვენს რეგიონში ნაკლებად».
მარია ტექნოლოგიების სწავლებას შშმ ადამიანებისთვისაც ცდილობს.
გვიყვება, რომ სრულიად დამოუკიდებლად ჟესტების ენა და ბრაილის შრიფტი ისწავლა, ბრაილით კომპიუტერული პროგრამები ააწყო და ერთ ქალს დასაქმებაშიც დაეხმარა.
«ჩვენთან 43 წლის ქალი მოვიდა, მას ვორდის და ექსელის სწავლა სურდა. მაგრამ უსინათლო იყო. Ჩემი დიდი ძალისხმევით 3 თვეში ამ ადამიანმა პროგრამირების საფუძვლები ისწავლა, შემდეგ კი ლენდინგ ფეიჯებიც ააწყო. გადავწყვიტე, დასაქმებაშიც დავხმარებოდი. დავუკავშირდი ჰილტონ ბათუმის HR-ს. ის ჩემი ბენეფიციარის სტაჟიორად აყვანაზე დამთანხმდა. სტაჟირების დასრულების შემდეგ კი მითხრა, რომ მას დასაქმებას უპირებდა. ასეც მოიქცა. შემდეგ კი რამდენიმე საფეხურით დაწინაურდა და ახლა კომპანიის IT ბორდის ერთ-ერთი წევრია. უკვე 3 წელია, მუშაობს და ძალიან კარგი ანაზღაურებაც აქვს».
ყველაფერთან ერთად მარია წულუკიძემ წიგნიც დაწერა — «აი-ია პროგრამირებაში». ის მალე გამოიცემა.
მისი სამომავლო გეგმები კი აკადემიის შექმნას უკავშირდება.
«ეს იქნება ადგილი სადაც ადამიანები ეცდებიან, რომ თავიანთი უნარები ბოლომდე გამოავლინონ და ისწავლონ IT ტექნოლოგიების ყველა საჭირო დეტალი».
ინტერნეტის ხელმისაწვდომობა საქართველოში —ვითარება და გამოწვევები
ინტერნეტის ხელმისაწვდომობა საქართველოში —ვითარება და გამოწვევები
ეთერო სახოკიას რიცხვებთან თამაში
ეთერო სახოკიას რიცხვებთან თამაში
