«რიცხვებთან მუშაობა მიყვარს, მგონია, რომ მათგან ბევრი ინფორმაციის მიღება შეიძლება. და მგონია, რომ რიცხვების მიერ მოწოდებული ინფორმაცია ყველაზე სწორია». — გვეუბნება ეთერო სახოკია, მონაცემთა ანალიზისა და მართვის სპეციალისტი.
«რიცხვებთან მუშაობა მიყვარს, მგონია, რომ მათგან ბევრი ინფორმაციის მიღება შეიძლება. და მგონია, რომ რიცხვების მიერ მოწოდებული ინფორმაცია ყველაზე სწორია». — გვეუბნება ეთერო სახოკია, მონაცემთა ანალიზისა და მართვის სპეციალისტი.
35 წლის ეთო, რომელიც პროფესიით ფინანსისტი და ეკონომისტია, უკვე 6 წელია, სტუდენტებს და დაინტერესებულ ადამიანებს მონაცემების დამუშავებას ასწავლის. თავიდან ფოკუსი Microsoft Exel-ზე ჰქონდა, ხოლო ბოლო 2 წელია, Power BI-ზე გადაერთო. ეთერო თავის ცოდნას იუთუბ არხის მეშვეობითაც ავრცელებს, რათა მონაცემთა მართვის ნიუანსები სულ უფრო მეტი ადამიანისთვის გახადოს ნაცნობი და ხელმისაწვდომი.
Microsoft Power BI მონაცემთა ვიზუალიზაციის ინტერაქტიური პროგრამაა, ძირითადი აქცენტით ბიზნეს ინტელექტზე. Power BI არის პროგრამული უზრუნველყოფის სერვისების, აპლიკაციებისა და და კონექტორების კრებული, რათა მონაცემთა შეუთავსებელი წყაროები თანმიმდევრულ, ვიზუალურად ჩაღრმავებულ და ინტერაქტიურ ცნობებად გადააქციონ. Power BI-ში მონაცემების შეყვანა პირდაპირ მონაცემთა ბაზიდან, ვებგვერდიდან, PDF-დან და ცხრილებიდან შეიძლება.
შემოსავლების სამსახურში, თავდაცვის სამინისტროში და სხვა საჯარო თუ კერძო ორგანიზაციებში მუშაობის შემდეგ ეთერომ ილიას უნივერსიტეტში მონაცემთა ანალიზისა და მართვის სწავლება დაიწყო. მას BTU მოჰყვა.
თუმცა, ახლა მისი დროის ძირითადი ნაწილი იუთუბ არხს და სასწავლო კურსს ეთმობა, რომელიც თავად შექმნა და რომელზე დარეგისტრირებაც მონაცემებით დაინტერესებულ ყველა მსურველს შეუძლია.
იუთუბ არხი შექმნა იმიტომ, რომ ცოდნის გაზიარება უყვარს და როგორც თავად ამბობს, კარგადაც გამოსდის.
«მომწონს ჩემი თავი ამ პროცესში. ამიტომ, მინდოდა, რომ ჩემი ცოდნა აუდიტორიის მიღმა, ელექტრონულ სივრცეშიც გადამეტანა, იუთუბი კი ამისთვის იდეალური ვარიანტია». — გვეუბნება ეთერო.
ეთეროს იუთუბ არხზე ათობით ვიდეოა განთავსებული. მათი დიდი ნაწილი — შედარებით ადრინდელი ვიდეოები ექსელს ეხება, უახლესი ვიდეოები კი Power BI-ის.
«თანამედროვე მსოფლიოში მნიშვნელოვანია, რამდენად სწრაფად შეძლებ ინფორმაციის დამუშავებას და ამ დამუშავებული ინფორმაციის საფუძველზე გადაწყვეტილების მიღებას. სწორედ ამ სისწრაფისთვის არის შექმნილი ეს პროგრამები, ამ მიზნით ხდება მათი განახლება. როგორც სწავლების, ისე უშუალოდ სწავლის პროცესში თავს ბევრი დეტალი იჩენს, რომლებიც თითქოს უმნიშვნელოა, მაგრამ რეალურად, ისინი ქმნიან ფონს და პროგრამას. ამავე ლოგიკით, ჩემთვის ადრე პრიორიტეტული ექსელი იყო, ახლა Power BI-ია». — ამბობს ეთერო.
მისივე თქმით, მონაცემთა მართვის შესწავლის პროცესი საკუთარ თავთან მუშაობას და კრეატივის გამომჟღავნებას ითხოვს.
«ამ პროცესში კი პატარა აღმოჩენებს აკეთებ საკუთარ თავში». — ამბობს ის. — «ეს პროფესია მოითხოვს, არ იყო ერთფეროვანი, მუდმივად სწავლობდე და ვითარდებოდე. საქმეს, რომელსაც აღმოაჩენ და ძალიან გიყვარს, მოფრთხილება სჭირდება, ისევე, როგორც ადამიანურ ურთიერთობებს».
ეთერო ყველაფერს, რაც თავად ისწავლა, როგორც მისი იუთუბ არხის გამომწერებს უზიარებს, ისე იმ ადამიანებსაც, ვისაც მონაცემთა მართვის და პროგრამა Power BI-ის სწავლა სიღრმისეულად და დაუყოვნებლივ უნდა.
ამისთვის მან კურსი შეიმუშავა და მიღებაც გამოაცხადა.
კურსი, რომელიც Power BI-ის ეხება, 12 შეხვედრას მოიცავს, ჯამში 30 საათს. ფასი 900 ლარია.
ეთერო ამბობს, რომ კურსი მონაწილეებს დაეხმარებათ, კარგად და საფუძვლიანად შეისწავლონ კომპიუტერული პროგრამები. პროგრამა მონაცემთა მართვის თეორიულ და პრაქტიკულ ნაწილს მოიცავს.
ეთეროს თქმით, კურსის შემდეგ მოსწავლეებს არ შეეშინდებათ დაბრკოლებების, პირიქით — მათთან გამკლავებისა და მოგვარების ზუსტი ხერხები ეცოდინებათ.
«Power BI რთული პროგრამაა, მისი სწავლა მარტივი არ არის — უამრავ დეტალს მოიცავს, რომელიც „იმალება“ და ნელ-ნელა, მუშაობის პროცესში იჩენს თავს». — ამბობს ეთერო. — «შეცდომების დაშვების იდეა, ჩემს ტრენინგებს მკაფიოდ გასდევს. ყველაფერს შეცდომებით ვსწავლობთ».
ეთერო ფიქრობს, რომ აუცილებელი არ არის, ადამიანმა არასდროს შეიცვალოს პროფესია და მხოლოდ იმ საქმიანობით დაკავდეს, რაც უნივერსიტეტში ისწავლა.
«რაც მეტ რამეს ისწავლის ადამიანი, მით უფრო წარმატებული იქნება მისი კარიერა და ცხოვრება». — გვეუბნება ის. მისი სამომავლო გეგმებიც ამ პრინციპს ეყრდნობა. ეთერო სწავლებასთან ერთად სწავლასაც აგრძელებს. — «მინდა, რომ ჩემი თავი სხვადასხვა მიმართულებით აღმოვაჩინო. მინდა, რომ რაღაც დროის მერე ჩემი იუთუბ არხი ინგლისურენოვანი გავხადო, მაგრამ ქართულს არასოდეს შევეშვები. ყველა ადამიანს აქვს თავისი პასუხისმგებლობა. მგონია, ჩემი წილი პასუხისმგებლობაა, ჩემი ცოდნა ქართულ ენაზე გავავრცელო».
