Epic Games Inc.-ის სასამართლოში წარდგენილი ინფორმაციის მიხედვით, Google თანახმაა, რომ Samsung Electronics Co.-ს ოთხი წლის განმავლობაში 8 მილიარდი აშშ დოლარი გადაუხადოს, რათა მისი აპლიკაციები Samsung-ის ტელეფონებზე ნაგულისხმევად (default) იყოს.
Epic Games Inc.-ის სასამართლოში წარდგენილი ინფორმაციის მიხედვით, Google თანახმაა, რომ Samsung Electronics Co.-ს ოთხი წლის განმავლობაში 8 მილიარდი აშშ დოლარი გადაუხადოს, რათა მისი აპლიკაციები Samsung-ის ტელეფონებზე ნაგულისხმევად (default) იყოს.
Google-ის პარტნიორობის ვიცე-პრეზიდენტმა, ჯეიმს კოლოტუროსმა სან-ფრანცისკოს სასამართლო პროცესზე ჩვენება მისცა და თქვა, რომ Google-მა და Samsung-მა აპლიკაციების მაღაზიის შემოსავალი უნდა გააზიარონ, რათა Android მობილური მოწყობილობები წინასწარ დაინსტალირებული Google Play-ით უზრუნველყონ.
Epic-მა, კომპანიამ, რომელიც პოპულარულ ვიდეო თამაშს, Fortnite-ს აწარმოებს, Google-ს 2020 წელს უჩივლა ბრალდებით, რომ კომპანია ანტიმონოპოლიურ კანონებს არღვევს.
Bloomberg-ზე დაყრდნობით, Epic ცდილობს, აჩვენოს, რომ Google-ის აღმასრულებლებმა Samsung-ის მოწყობილობებზე მესამე მხარის აპლიკაციების მაღაზიებს ხელი შეუშალეს, რათა Google Play-ს მოგება არ შემცირებულიყო.
კოლოტუროსის ჩვენების თანახმად, Google Play-ის შემოსავლის ნახევარი ან მეტი Samsung-ის მოწყობილობებზე მოდის.
Epic ამტკიცებს, რომ Google-მა Android აპებზე უკანონო მონოპოლია შექმნა, რადგან მას მოგების გაზრდა საკომისიოს მეშვეობით შეუძლია — 15-დან 30 პროცენტამდე აპლიკაციის შიგნით შესრულებულ შესყიდვებზე.
Google ამტკიცებს, რომ ამას Apple-თან და მისი აპლიკაციების მაღაზიასთან კონკურენციის მიზნით აკეთებდა.
ადრე სასამართლო პროცესზე Google-ის ადვოკატმა თქვა, რომ კომპანიას ვერ ექნება მონოპოლია, რადგან ის ისეთი კომპანიების კონკურენციას ეჯახება, როგორიცაა Apple.
თუმცა, სექტემბერში Google და Apple ანტიმონოპოლიური სარჩელით გადახლართულები იყვნენ. საქმე გადახდებს ეხება, რომლებსაც Google Apple-ს უხდის, რათა უზრუნველყოს, რომ Google-ის საძიებო სისტემა iPhone-ებზე ავტომატურად განთავსდეს.
Epic-ის ადვოკატი, გარი ბორნშტეინი Google-ს კონკურენციის დაბლოკვის მიზნით, დაშინებასა და მოსყიდვაში ადანაშაულებდა.
Google-მა Samsung-ს შესთავაზა, ოთხი წლის განმავლობაში $200 მილიონის გადახდა, ასე რომ Samsung-ის Galaxy აპლიკაციების მაღაზია ხელმისაწვდომი გახდებოდა Google Play Store-ში. ეს იდეა მოგვიანებით დაივიწყეს და Google-მა Samsung-თან ამჟამინდელ კონტრაქტს მოაწერა ხელი, რომელიც ოთხი წლის განმავლობაში 8 მილიარდი აშშ დოლარის გადახდას გულისხმობს.
თავის ჩვენებაში კოლოტუროსმა თქვა, რომ თუ Google-თან აფილირებული აპლიკაციების მაღაზია ტელეფონებზე წინასწარ არ იქნებოდა ჩამოტვირთული, ხალხი სავარაუდოდ Apple-ზე გადაერთვებოდა.
სასამართლო პროცესი კალიფორნიის ჩრდილოეთში მიმდინარეობს და სავარაუდოდ წლის ბოლომდე გაგრძელდება.
