DataFest Tbilisi რუსულ კანონთან დაკავშირებით აცხადებს, რომ ის აღმოფხვრის როგორც საქართველოს საჯარო უწყებებსა და საერთაშორისო დონორებს შორის თანამშრომლობის შესაძლებლობას, ისე, ეჭვქვეშ აყენებს დამოუკიდებელი მედიისა და ძლიერი სამოქალაქო საზოგადოების არსებობას.
DataFest Tbilisi რუსულ კანონთან დაკავშირებით აცხადებს, რომ ის აღმოფხვრის როგორც საქართველოს საჯარო უწყებებსა და საერთაშორისო დონორებს შორის თანამშრომლობის შესაძლებლობას, ისე, ეჭვქვეშ აყენებს დამოუკიდებელი მედიისა და ძლიერი სამოქალაქო საზოგადოების არსებობას.
DataFest Tbilisi ფესტივალია, რომელიც ყოველწლიურად თავს უყრის იმ ადამიანებს, რომელთა საქმიანობა დაკავშირებულია მონაცემთა მეცნიერებასთან და ვიზუალიზაციასთან — მარკეტერებს, ფინანსისტებს, დეველოპერებს, მონაცემთა ანალიტიკოსებს, ხელოვნური ინტელექტის ინჟინრებს, დიზაინერებს, სტარტაპერებს, ჟურნალისტებს, სამოქალაქო აქტივისტებს და სახელმწიფო მართვის სპეციალისტებს.
DataFest Tbilisi-ის გუნდი ხაზს უსვამს, რომ რუსული კანონის მსგავსი კანონები ჩვენი რეგიონის მრავალ ქვეყანაში მიიღეს, რომლებიც, სავარაუდოდ, სიტყვის თავისუფლების მოსპობას ისახავს მიზნად და რუსეთი სწორედ ამისი ერთ-ერთი მაგალითია.
ამასთან, ფესტივალის გუნდი აცხადებს, მათი საქმიანობა ახლა უფრო აქტუალურია — ისინი ქმნიან პლატფორმა გამოცდილების, ცოდნისა და შთაგონების გაზიარებისთვის, «რათა ვისწავლოთ ერთმანეთისგან, ვიფიქროთ და შევქმნათ სიახლეები, გამოვიყენოთ მონაცემები და ტექნოლოგია დემოკრატიის გასაძლიერებლად».
DataFest Tbilisi აცხადებს:
«2017 წლიდან DataFest Tbilisi სხვადასხვა სექტორს, ქვეყანას, პროფესას შორის თანამშრომლობას უწყობს ხელს. წლებია, ჩვენ ამაყად ვთანამშრომლობთ საერთაშორისო დონორებთან, კერძო კომპანიებთან და საჯარო უწყებებთან და მათთან ერთად შთამაგონებელ ატმოსფეროს ვქმნით.
შემოთავაზებული კანონით არა მხოლოდ საფრთხე ემუქრება ჩვენს მიდგომას საქართველოს საჯარო უწყებებსა და საერთაშორისო დონორებს შორის თანამშრომლობის შესაძლებლობის აღმოფხვრით, არამედ დამოუკიდებელი მედიისა და აყვავებული სამოქალაქო საზოგადოების არსებობაც საეჭვო ხდება.
წლების განმავლობაში ჩვენ გვქონდა შესაძლებლობა, გაგვეზიარებინა გამოცდილება რეპრესიულ ქვეყნებში მცხოვრები პროფესიონალებისგან.
სამწუხაროდ, ვშიშობთ, რომ შემოთავაზებული კანონი მიზნად ისახავს ქართული სამოქალაქო სივრცის ანალოგიურად შეზღუდვას.
გვჯერა, რომ ჩვენი სამუშაო ახლა უფრო აქტუალურია — ჩვენ უნდა შევქმნათ პლატფორმა გამოცდილების, ცოდნისა და შთაგონების გაზიარებისთვის, რათა ვისწავლოთ ერთმანეთისგან, ვიფიქროთ და შევქმნათ სიახლეები, გამოვიყენოთ მონაცემები და ტექნოლოგია დემოკრატიის გასაძლიერებლად.
ჩვენ გვჯერა, რომ ამ კანონის წინააღმდეგ ბრძოლაში ჩვენი საუკეთესო სტრატეგია იმის კეთებაა, რაც ყველაზე კარგად გამოგვდის — მონაცემთა ენთუზიასტების დაკავშირება და ერთმანეთისგან ცოდნის, გამოცდილების და შთაგონების გაზიარება და წვლილი შევიტანოთ ამ კანონის წინააღმდეგ ბრძოლაში გამარჯვებაში».
«ქართულმა ოცნება» მეორედ დააინიციირა რუსული კანონი. მას უკვე განიხილავენ პარლამენტში პირველი მოსმენით.
ანალოგიური კანონპროექტი «ქართულმა ოცნებამ» შარშანაც დააინიციირა და პირველი მოსმენით დაამტკიცა კიდეც. თუმცა, მარტში, მასობრივი საპროტესტო გამოსვლების შემდეგ უკან გაიწვია.
ახალ კანონპროექტში ყველა ჩანაწერი უცვლელია, გარდა ერთისა — «უცხოური გავლენის აგენტის» ნაცვლად გამოყენებული იქნება ტერმინი — «უცხოური ძალის ინტერესების გამტარი ორგანიზაცია». შინაარსი უცვლელია და საკუთარი ქვეყნის წინააღმდეგ მუშაობაზე მიუთითებს.
მმართველი პარტიის მიზანია, ყველა ის არასამთავრობო ორგანიზაცია და მედია, რომელთაც დაფინანსების ნაწილი საერთაშორისო წყაროებიდან აქვთ მიღებული — «უცხოური ძალის ინტერესების გამტარ ორგანიზაციად» გამოაცხადონ და შესაბამის ბაზაში რეგისტრაცია დაავალდებულონ.
სწორედ მსგავსი კანონის საფუძველზე დევნიან რუსეთში არასამთავრობო ორგანიზაციებს და მედიებს.
«უცხოური ძალის ინტერესების გამტარი ორგანიზაცია» შესაძლოა გაიგივდეს «უცხოელ ჯაშუშთან» და «მოღალატესთან», რაც მოახდენს სამოქალაქო საზოგადოების სტიგმატიზაციას, დააზიანებს მათ რეპუტაციას და შეაფერხებს მათ აქტივობებს.
კანონპროექტში არაფერია ნათქვამი სტარტაპების დაფინანსებაზე, თუმცა, სტარტაპ ინდუსტრია, ინოვაციური სისტემები და ტექნოლოგიები საქართველოში კვლავ ახალი და მყიფეა. შესაბამისად, ამ სფეროში ფულის დაბანდება ნებისმიერი საფინანსო ორგანიზაციისა და კერძო პირისითვის ისედაც სარისკოა.
კანონპროექტის დამტკიცებამ შესაძლოა, არსებული რისკები კიდევ უფრო გაზარდოს, ბევრმა ინვესტორმა თავი შეიკავოს და მოხდეს ინვესტიციების გადინება.
რუსული კანონი ყველას შეეხება.
რუსული კანონი არ არის საქართველოს არჩევანი.
