CDC Business/კომლი/-ის სამეწარმეო განათლების კონსულტანტი, თეონა დალაქიშვილი ამბობს, რომ მმართველი პარტიის მიერ რუსული კანონის მეორედ დაინიციირებას IT სექტორზე ცალსახად უარყოფითი გავლენა ექნება.
CDC Business/კომლი/-ის სამეწარმეო განათლების კონსულტანტი, თეონა დალაქიშვილი ამბობს, რომ მმართველი პარტიის მიერ რუსული კანონის მეორედ დაინიციირებას IT სექტორზე ცალსახად უარყოფითი გავლენა ექნება.
თეონას შეფასებით, რუსული კანონის მიღების მთავარი მიზანი ევროინტეგრაციის პროცესის შენელება ან სულაც შეწყვეტაა.
«დეკემბერში კანდიდატის სტატუსი მივიღეთ, რაც საქართველოს მოქალაქეების დამსახურება იყო. დღეს არსებობს რისკი, რომ ეს პროცესი შენელდეს ან საერთოდ შეწყდეს». — ამბობს თეონა დალაქიშვილი.
თეონა ხაზგასმით აღნიშნავს, რომ USAID-ისა და ევროკავშირის დაფინანსებების გარეშე უამრავი მცირე და საშუალო მეწარმე საქმიანობის დაწყებასა თუ განვითარებას საერთოდ ვერ შეძლებდა.
მისი თქმით, საქართველოსა და ევროკავშირს შორის ნებისმიერი მოლაპარაკება ჩვენი ქვეყნისთვის სასიკეთო იყო და ეს პროცესი კანდიდატის სტატუსის მიღების შემდეგ კიდევ უფრო უნდა გაღრმავებულიყო. თუმცა, ახლა ეს ყველაფერი რისკის ქვეშაა.
«საქართველოში სამეწარმეო და სტარტაპ ეკოსისტემის განვითარების ყველაზე დიდი დამაბრკოლებელი პატარა ბაზარია — შესაბამისად, უმნიშვნელოვანესი იყო ის შეთანხმებები, რომლების საქართველოსა და ევროკავშირს შორის შედგა. ქვეყნის გარეთ უამრავი სტარტაპი და მეწარმე გავიდა — კანონის მიღება უკუსვლა და ამდენი წლის მანძილზე დახარჯული რესურსის ფუჭად გაფლანგვა იქნება».
კანონში არაფერია ნათქვამი სტარტაპების დაფინანსებაზე. თუმცა, სტარტაპ ინდუსტრია, ინოვაციური სისტემები და ტექნოლოგიები საქართველოში ამ ეტაპზე ახალი და მოწყვლადია. შესაბამისად, ამ სფეროში ფულის დაბანდება ნებისმიერი საფინანსო ორგანიზაციისა და კერძო პირისითვის ისედაც სარისკოა.
თეონა ფიქრობს, რომ რუსული კანონის მიღება ამ რისკს კიდევ უფრო მეტად გაზრდის, რაც საბოლოოდ უარყოფით გავლენას მთლიან სექტორზე მოახდენს. მისი თქმით, ამის ნათელი მაგალითები რუსეთი და ბელარუსი არიან.
«კანონში შესაძლოა სტარტაპები პირდაპირ არ არის ნახსენები, თუმცა ყველა დაფინანსება მსოფლიო ბანკიდან და ევროკავშირიდან შემოდის. ყველას, ვინც სოციალურ ინოვაციებზე მუშაობს, კანონი აუცილებლად შეეხება. მაგალითად, რუსეთისა და ბელარუსის ბაზარი, მსგავსი მიდგომის გამო, უამრავი ინვესტორისთვის უინტერესო გახდა — ამ ქვეყნებიდან ბევრი საერთაშორისო ორგანიზაცია გავიდა». — განაცხადა თეონა დალაქიშვილმა.
«ქართულმა ოცნებამ» მეორედ დააინიციირა რუსული კანონი. მის განხილვას მსვლელობა პარლამენტში 8 აპრილს, ბიუროს სხდომაზე მიეცემა.
ანალოგიური კანონპროექტი «ქართულმა ოცნებამ» შარშანაც დააინიციირა და პირველი მოსმენით დაამტკიცა კიდეც. თუმცა, მარტში, მასობრივი საპროტესტო გამოსვლების შემდეგ უკან გაიწვია.
ახალ კანონპროექტში ყველა ჩანაწერი უცვლელია, გარდა ერთისა — «უცხოური გავლენის აგენტის» ნაცვლად გამოყენებული იქნება ტერმინი — «უცხოური ძალის ინტერესების გამტარი ორგანიზაცია». შინაარსი უცვლელია და საკუთარი ქვეყნის წინააღმდეგ მუშაობაზე მიუთითებს.
მმართველი პარტიის მიზანია, ყველა ის არასამთავრობო ორგანიზაცია და მედია, რომელთაც დაფინანსების ნაწილი საერთაშორისო წყაროებიდან აქვთ მიღებული — «უცხოური ძალის ინტერესების გამტარ ორგანიზაციად» გამოაცხადონ და შესაბამის ბაზაში რეგისტრაცია დაავალდებულონ.
სწორედ მსგავსი კანონის საფუძველზე დევნიან რუსეთში არასამთავრობო ორგანიზაციებს და მედიებს.
«უცხოური ძალის ინტერესების გამტარი ორგანიზაცია» შესაძლოა გაიგივდეს «უცხოელ ჯაშუშთან» და «მოღალატესთან», რაც მოახდენს სამოქალაქო საზოგადოების სტიგმატიზაციას, დააზიანებს მათ რეპუტაციას და შეაფერხებს მათ აქტივობებს.
რუსული კანონი ყველას შეეხება.
რუსული კანონი არ არის საქართველოს არჩევანი.
