ალტე უნივერსიტეტის ციფრული ტრანსფორმაციის ცენტრის ხელმძღვანელის, ნანა დიხამინჯიას განცხადებით, მმართველი პარტიის მიერ ინიცირებული რუსული რეპრესიული კანონპროექტი IT-სა და ტექნოლოგიების სფეროზე უარყოფითად აისახება. მისი თქმით, საერთაშორისო ორგანიზაციები კანონის მიღების შემთხვევაში, საქართველოში პროგრამების შეწყვეტას პროგნოზირებენ.
ალტე უნივერსიტეტის ციფრული ტრანსფორმაციის ცენტრის ხელმძღვანელის, ნანა დიხამინჯიას განცხადებით, მმართველი პარტიის მიერ ინიცირებული რუსული რეპრესიული კანონპროექტი IT-სა და ტექნოლოგიების სფეროზე უარყოფითად აისახება. მისი თქმით, საერთაშორისო ორგანიზაციები კანონის მიღების შემთხვევაში, საქართველოში პროგრამების შეწყვეტას პროგნოზირებენ.
ნანა დიხამინჯია ხაზს უსვამს, რომ ის დაფინანსებები, რომლითაც სკოლებსა და უნივერსიტეტებში არაერთი პროექტი ხორციელდება, სწორედ საერთაშორისო ორგანიზაციებისგან შემოდის.
«ბევრი ორგანიზაცია ზუსტად ამ გრანტების საფუძველზე მუშაობს. ახორციელებს სხვადასხვა საგანმანათლებლო პროექტებს, განსაკუთრებით, მოსწავლეებისა და სტუდენტებისთვის. თუ ამ ორგანიზაციებს შეეზღუდებათ მოქმედების არეალი და გაუჭირდებათ მუშაობა ამ პირობებში, როდესაც მათ აგენტებს უწოდებენ და საზოგადოებაში რაღაც გაუგებარი სახელი აქვთ, ამასთან, ფინანსურად სხვადასხვა ტიპის შეზღუდვები დაეკისრებათ, რა თქმა უნდა, ეს პირდაპირ აისახება მათ მიერ შესრულებულ პროგრამებზე.
საერთაშორისო ორგანიზაციები ისეთ განცხადებებს აკეთებენ, რომ შეიძლება საერთოდ აღარ გააგრძელონ პროექტები კანონის მიღების პირობებში. სკოლებსა და უნივერსიტეტებში ტექნოლოგიური განვითარება საერთაშორისო ორგანიზაციების დაფინანსებით ხდება. ეს, რა თქმა უნდა, ცუდად აისახება IT-სა და ტექნოლოგიების სფეროზე.
ჩემი აზრით, მნიშვნელოვანია, რომ საზოგადოების ნებისმიერმა წარმომადგენელმა წინააღმდეგობა გაუწიოს კანონის მიღებას, რადგან ეს კანონი პირდაპირ გვიბიძგებს რუსეთისკენ. ეს კანონი ხელს უშლის ევროპასთან ჩვენს ინტეგრაციას. ევროპასთან ინტეგრაცია ნიშნავს უკეთეს ტექნოლოგიურ განათლებას, უკეთეს მეცნიერებას და უფრო ძლიერ განათლებას.»
ნანა დიჯამინჯია ერთ-ერთი ხელმომწერია განცხადებისა, რომელიც ქართველმა სტარტაპერებმა და მეწარმეებმა «უცხო ქვეყნის გავლენის აგენტების შესახებ» რუსული რეპრესიული კანონპროექტის წინააღმდეგ გაავრცელეს.
განცხადებაში მითითებულია, რომ ისინი კატეგორიულად ეწინააღმდეგებიან მმართველი პარტიის და «ქართული ოცნებიდან» ფორმალურად გასული დეპუტატების ამ ინიციატივის კანონად ქცევას.
მათი თქმით, კანონი საქართველოს განვითარების შესაძლებლობას ართმევს და პარტნიორებისადმი მტრულ დამოკიდებულებას ავლენს.
საქართველოს ხელისუფლება და «ქართული ოცნებიდან» ფორმალურად გასული დეპუტატების ჯგუფი გეგმავს, დაამტკიცოს კანონპროექტი, რომელიც «უცხო ქვეყნის გავლენის აგენტებს» ეხება.
ე.წ ხალხის ძალის კანონპროექტი, რომლის განხილვაც პარლამენტში უკვე დაიწყო, არსით რუსული და რეპრესიულია. დოკუმენტის თანახმად, უცხო ქვეყნის აგენტებად უნდა დარეგისტრირდნენ არასამთავრობო ორგანიზაციები, მედიები და სხვა იურიდიული პირები, რომელთა შემოსავლის 20%-ზე მეტის «წყარო უცხოური ძალაა».
ამ ვერსიის თანახმად, ყველა ზემოთჩამოთვლილი სუბიექტი საჯარო რეესტრში თავად უნდა დარეგისტრირდეს აგენტად, წინააღმდეგ შემთხვევაში კი რამდენიმე ათასლარიანი ჯარიმის გადახდა მოუწევს.
კანონპროექტი «ქართულმა ოცნებამ» მოიწონა და თავადაც დაარეგისტრირა მისი გაუარესებული ვარიანტი, რომელიც სისხლის სამართლის პასუხისმგებლობას და პატიმრობას ითვალისწინებს კანონით გათვალისწინებული მოთხოვნების შეუსრულებლობის შემთხვევაში.
კანონპროექტის გაუარესებულ ვერსიაში უცხოეთის აგენტად რეგისტრაციის ვალდებულება ექნება ნებისმიერ ფიზიკურ და იურიდიულ პირს, რომელიც დაფინანსებას უცხოეთიდან იღებს და არ არის დიპლომატი, კონსული, დიპლომატიური სამსახურისა და საკონსულო დაწესებულების თანამშრომელი. კანონი არ შეეხება უცხო ქვეყნის თანამდებობის პირებს, ასევე, პირს, რომელიც საქველმოქმედო საქმიანობას ეწევა, პირს, რომელიც რელიგიურ, საგანმანათლებლო, მეცნიერულ, აკადემიურ ან სახელოვნებო საქმიანობას «კეთილსინდისიერად» ეწევა. თუმცა, არ ვიცით, კანონპროექტის ავტორები როგორ ინტერპრეტაციას გაუკეთებენ «კეთილსინდისიერ» საქმიანობას.
