მომხმარებელთა უფლებების ცენტრი: ახალი კანონი უნებართვო SMS რეკლამებს ვერ აღმოფხვრის 

ცენტრის განმარტებით: 

1. საქართველოში SMS რეკლამის მიმწოდებლებს, განსხვავებით ევროპული ქვეყნებისგან, არ მოეთხოვებათ რეგისტრაცია. შესაბამისად, ნებისმიერ კომპანიას შეუძლია, დაიქირავოს 10–15 ან მეტი SMS პროვაიდერი და საზღვარგარეთიდან აგზავნოს სარეკლამო SMS–ები. პერსონალურ მონაცემთა დაცვის ინსპექტორი კი დამქირავებელ კომპანიას ვერ დააჯარიმებს, რადგან მონაცემებს ამუშავებს დაქირავებული კომპანია, რომელიც საქართველოში არ არის რეგისტრირებული.
   
   საზღვარგარეთის ქვეყნებში რეგისტრაციის ვალდებულება გულისხმობს იმას, რომ თუ ქვეყანაში რეგისტრაციას არ გაივლი SMS რეკლამის პროვაიდერად, საკომუნიკაციო კომპანიას (მაგალითად, მაგთის/სილკნეტს) არ აქვს უფლება, გაატაროს შენი გზავნილი;
2. საზღვარგარეთ მომხმარებლებს უფლება აქვთ, უარი განაცხადონ, როგორც ყველანაირ სარეკლამო SMS-ზე, ასევე აირჩიონ, საიდან უნდათ რეკლამის მიღება და საიდან არა. არსებობს რეესტრები, სადაც შეგიძლიათ დაარეგისტრიროთ თქვენი ნომერი და აუკრძალოთ ყველას SMS–რეკლამის ამ ნომერზე გამოგზავნა.
   
   ინდივიდუალურად, რომელიმე ცალკეული კომპანიისათვის SMS–ის ასაკრძალად არსებობს მარტივი მეთოდები და არა ის, როგორც ჩვენთანაა (SMS off და სხვა გაურკვეველი კოდები);
3. ყველა ნორმალურ ქვეყანაში არსებობს ე.წ. «წყნარი საათები». როგორც წესი, საღამოს 8 საათიდან დილის 9 საათამდე. ამ პერიოდში სარეკლამო SMS–ის გაგზავნა არ შეიძლება და ექვემდებარება ჯარიმას. ჩვენთან არც ეს საათებია დაწესებული და როგორც აღვნიშნე, საზღვარგარეთ არსებულ პროვაიდერს ვერ დააჯარიმებ ვერც ამ დარღვევისათვის (გაითვალისწინეთ დროითი განსხვავებებიც).
4. არ არსებობს ბერკეტი დაჯარიმდეს რეკლამის დამკვეთი და არამარტო მომწოდებელი, თუ მომხმარებელს SMS რეკლამას მისი სურვილის საწინააღმდეგოდ გაუგზავნიან.

«მომხმარებელთა უფლებების ცენტრი» ამბობს, რომ ამ პრობლემების თაობაზე 1000 მოქალაქის ხელმოწერით მთავრობას მიმართეს და ახლა რეაგირების მოლოდინში არიან. 

1 მარტიდან სარეკლამო SMS-ებს აღარ მიიღებთ, თუ ეს თავად არ გსურთ

თემის მიხედვით

1 მარტიდან სარეკლამო SMS-ებს აღარ მიიღებთ, თუ ეს თავად არ გსურთ