USAID და ბიზნესისა და ტექნოლოგიების უნივერსიტეტი საქართველოს 6 რეგიონიდან 1500 ქალს ICT მიმართულებით გადაამზადებს. პარტნიორობა ICT სექტორში ქალთა კარიერული პერსპექტივების შესახებ ცნობიერების ამაღლებას დაეხმარება.
USAID და ბიზნესისა და ტექნოლოგიების უნივერსიტეტი საქართველოს 6 რეგიონიდან 1500 ქალს ICT მიმართულებით გადაამზადებს. პარტნიორობა ICT სექტორში ქალთა კარიერული პერსპექტივების შესახებ ცნობიერების ამაღლებას დაეხმარება.
პარტნიორობის ფარგლებში ადმინისტრაციულ გამყოფ ხაზთან მდებარე და ეთნიკური უმცირესობებით დასახლებულ ქალაქებში რვა ცენტი შეიქმნება. ცენტრები გაიხსნება თელავში, გორში, ახალციხეში, ოზურგეთში, ზუგდიდში, წალენჯიხაში, ტყიბულსა და ამბროლაურში.
USAID და BTU ამბობენ, რომ კურსდამთავრებულთა დასაქმებაზეც იზრუნებენ.
სასწავლო პროგრამაში აპლიკაციის კოდირება, მომხმარებლის ინტერფეისის დიზაინი, გრაფიკული დიზაინი, პროგრამული უზრუნველყოფის ტესტირება და ციფრული მარკეტინგი შედის.
ახალი პარტნიორობის ოფიციალურად გამოცხადებას USAID-ის მისიის დირექტორი ჯონ პენელი ესწრებოდა, რომელმაც აღნიშნა, რომ სიახლე დადებითად იმოქმედებს, როგორც ქვეყნის შიგნით, ასევე მის ფარგლებს გარეთ, საერთაშორისო ბაზარზე.
«ინვესტიციებს საქართველოს მომავალ ეკონომიკურ ზრდასა და ქვეყნის კეთილდღეობაში ვდებთ. ნიჭიერი, შემოქმედებითი და მაღალკვალიფიციური ICT კადრები საქართველოს ბიზნესის შემოსავლების ზრდას და საერთაშორისო ბაზრებზე, მათ შორის ევროკავშირსა და შეერთებულ შტატებში ინტეგრაციას შეუწყობს ხელს» — აღნიშნა ჯონ პენელმა.
ქალების ტექნოლოგიურ სფეროში მეტად ჩართვის მცდელობა და სურვილი ახალი არ არის. ტექნოლოგიების სექტორში ქალთა როლის გაძლიერების მიზნით, 2019 წელს UN Women-თან თანამშრომლობით, ბიზნესისა და ტექნოლოგიების უნივერსიტეტმა პროექტი — «500 ქალი ტექნოლოგიებში» განახორციელა.
ბიზნესისა და ტექნოლოგიების უნივერსიტეტის კიდევ ერთი გადამზადების პროექტი, ამჟამად 50-ზე მეტ ადგილობრივ და საერთაშორისო ინდუსტრიულ პარტნიორს აერთიანებს.
