Signify არის ციფრული კონტრაქტინგის პირველი პლატფორმა საქართველოში. კომპანია მომხმარებლებს გაციფრულებისთვის საჭირო ყველა სერვისსა და კომპონენტს ერთ სივრცეში სთავაზობს, რაც გულისხმობს — დოკუმენტის მომზადებას, გაგზავნას, ხელმოწერას, დოკუმენტის ერთ სივრცეში შენახვასა და მართვას.
Signify არის ციფრული კონტრაქტინგის პირველი პლატფორმა საქართველოში. კომპანია მომხმარებლებს გაციფრულებისთვის საჭირო ყველა სერვისსა და კომპონენტს ერთ სივრცეში სთავაზობს, რაც გულისხმობს — დოკუმენტის მომზადებას, გაგზავნას, ხელმოწერას, დოკუმენტის ერთ სივრცეში შენახვასა და მართვას.
როგორც კოპმანიის მმართველი პარტნიორი, ზვიად წოწკოლაური dev.ge-სთან ამბობს, Signify-ში სჯერათ, რომ ხელშეკრულებების, დოკუმენტებისა და ხელმოწერების მომავალი არის ციფრული.
Signify-ს შექმნა პარტნიორებმა 2020 წლის დეკემბერში გადაწყვიტეს, როცა პანდემიის პირობებში დოკუმენტების ფურცელზე ხელმოწერა და მართვა კომპანიებისთვის განსაკუთრებით მწვავე პრობლემად გადაიქცა.
«მიუხედავად იმისა, რომ ქვეყანაში უკვე 10 წელზე მეტია არსებობს საკანონმდებლო საფუძველი იმისთვის, რომ იურიდიული გარიგებები ელექტრონულად მოხდეს, კომპანიების უმეტესობა ამას მაინც ფურცლებზე აკეთებდა. იმ მომენტში დავიჯერეთ, რომ ქვეყანაში ფურცლომანიის დამარცხებისთვის საჭირო იყო მარტივი პროდუქტის შექმნა, რომელიც ამ პრობლემას მოაგვარებდა. დაწყებიდან 3 თვეში გავუშვით პირველადი MVP პროდუქტი. გაშვებიდან 1 თვეში კი უკვე დავრწმუნდით, რომ სწორ საქმეს ვაკეთებდით და სწორ დროს»
როგორც ზვიადი dev.ge-სთან საუბრისას ამბობს, ამ ეტაპზე Signify-ს მთავარი გამოწვევა არის მომხმარებლის ქცევის შეცვლა.
«პირველივე დღიდან ჩვენი ძალისხმევა მიმართულია, ერთი მხრივ, პროდუქტის განვითარებაზე და მასშტაბირებაზე, ხოლო მეორე მხრივ, ზოგადად ციფრული დოკუმენტბრუნვის და ზოგადად ელექტრონული ხელმოწერების ცნობადობის გაზრდისკენ», — ამბობს წოწკოლაური.
უკვე 2 წელი ხდება რაც Signify ქართულ ბაზარზე გამოჩნდა და მას თითქმის ყველა ინდუსტრიაში იყენებენ. კლიენტებს შორის არიან: ბანკები, სამშენებლო კომპანიები, სადაზღვევო კომპანიები, რითეილერები, საგანმანათლებლო თუ ტურისტული ორგანიზაციები. როგორც ზვიადი ამბობს, დღევანდელი მონაცემებით, უკვე 300 ათასამდე უნიკალურმა ადამიანმა ერთხელ მაინც ისარგებლა პროდუქტით და გამოსცადა ელექტრონული ხელმოწერა.
«ვართ პატარა, მაგრამ ეფექტური გუნდი. ახლა Signify-ს გამოცდილებას ქმნის 13 ადამიანი. მთავარი, რაც ჩვენს გუნდს გამოარჩევს, არის რწმენა, რომ რაღაც ღირებულს ვაკეთებთ როგორც ადამიანებისთვის, ისე, ბიზნესებისთვის, ქვეყნისთვის და ზოგადად გარემოსთვის».
ზვიადი ამბობს, რომ მომდევნო ერთი წელი მთავარი ამოცანა იქნება ქართულ ბაზარზე განაგრძონ ზრდა და ამასთან, პროდუქტი რეგიონის მასშტაბით გაიტანონ.
«დოკუმენტის სრული სასიცოცხლო ციკლი ბევრად უფრო ფართოა, ვიდრე ხელმოწერა. ჩვენი მიზანია, რომ ხელმოწერის გარდა, ჩვენს მომხმარებლებს გავუმარტივოთ, ერთი მხრივ, იურიდიული დოკუმენტების მომზადებისა და, მეორე მხრივ, ამ დოკუმენტების შენახვისა და მართვის პროცესი».
