უკვე რამდენიმე წელია, რაც ქართულ ბაზარზე სტარტაპ ბიურო გამოჩნდა, რომელიც მჭიდროდ თანამშრომლობს კერძო თუ საჯარო სექტორთან, რათა მათი ჩართულობით ქვეყანაში წარმატებით დანერგონ ჰაკათონები, ბიზნეს ბანაკები, პრე-აქსელერაციისა და აქსელერაციის პროგრამები, ტრენინგები, კონფერენციები და უნარ-ჩვევებისა თუ შესაძლებლობების განვითარების სხვა პროგრამები მეწარმეებისთვის, ინოვატორებისა და შემოქმედებისათვის.
უკვე რამდენიმე წელია, რაც ქართულ ბაზარზე სტარტაპ ბიურო გამოჩნდა, რომელიც მჭიდროდ თანამშრომლობს კერძო თუ საჯარო სექტორთან, რათა მათი ჩართულობით ქვეყანაში წარმატებით დანერგონ ჰაკათონები, ბიზნეს ბანაკები, პრე-აქსელერაციისა და აქსელერაციის პროგრამები, ტრენინგები, კონფერენციები და უნარ-ჩვევებისა თუ შესაძლებლობების განვითარების სხვა პროგრამები მეწარმეებისთვის, ინოვატორებისა და შემოქმედებისათვის.
dev.ge სტარტაპ ბიუროსა და აქსელის თანადამფუძნებელს, გური ქოიავას დაუკავშირდა, რათა უკეთ გაერკვია, როგორ მუშაობს ბიურო საქართველოში და როგორ ეხმარება ის ქართულ ბიზნესს სხვადასხვა ღონისძიების დაგეგმვაში.
«2018 წელის დასაწყისში მე და ჩემმა თანადამფუძნებელმა, ჰაიკმა მივიღეთ გადაწყვეტილება, საქართველოს ტექნოლოგიური და ინოვაციური ეკოსისტემის განვითარებისთვის შეგვექმნა ორგანიზაცია, რომლის ვალიდაცია ჩვენი პირველი პროექტის, Fuckup Nighs Tbilisi-ის წარმატებამ გამოიწვია. ფაბრიკის საკონფერენციო სივრცეს 350 დამსწრე ესტუმრა, მათ შორის, სტარტაპების მომავალი დამფუძნებლები, სტუდენტები და ITC-ში დასაქმებული ადამიანები და 4 წარმატებული სპიკერის საქმიან მარცხებს მოუსმინეს».
სტარტაპ ბიურომ დღემდე უნარ-ჩვევებისა თუ შესაძლებლობების განვითარების 200-ზე მეტი სხვადასხვა პროგრამა გამართა. პროექტებს შორისაა: ProductTank Tbilisi, PechaKucha Night Tbilisi, Techstars Startup Week Georgia, Future Agro Challenge Georgia, ბიზნეს ბანაკი • Business Bootcamp, NASA Space Apps Challenge, Global Game Jam Georgia, Tbilisi Startup Day და სხვა.
«ჩვენ ამ ღონისძიებებს ვმართავდით პარტნიორების ძლიერი მხარდაჭერით კერძო თუ საჯარო სექტორებიდან. საბოლოო ჯამში, არაფორმალური განათლების ფორმატები შევთავაზეთ საქართველოს 70 ათასზე მეტ მოქალაქეს და რეზიდენტს. ჩვენმა ნეთვორქინგმა შედეგები გამოიღო დაასაქმა უამრავი ადამიანი, სიტყვა „სტარტაპი“ გაიგო უფრო მეტმა ადამიანმა და შემდეგ წლებში დავინახეთ, როგორ მოევლინნენ ამ ქვეყანას სტარტაპ დამფუძნებლებად ჩვენს ქომუნითიში მოსიარულე ადამიანები», — ამბობს გური ქოიავა.
ის dev.ge-ს უყვება, რომ სტარტაპ ბიურომ ხელი შეუწყო და გააძლიერა საქართველოს სტარტაპ ეკოსისტემა სხვა პარტნიორებთან ურთიერთთანამშრომლობით, რაც, მისი თქმით, საბოლოოდ აისახა საქართველოს გამოჩენაში გლობალურ სტარტაპ რუკაზე.
«სასიხარულოა, რომ დღეს ვხედავთ ბევრ აქტორს და სტარტაპ ეკოსისტემის გამაძლიერებელ სხვა ორგანიზაციებს, რომლებიც მომრავლდნენ, გაძლიერდნენ და გაერთიანებული ძალებით და საერთო მიზნით ვაგრძელებთ ამ ეკოსისტემის გაძლიერებას, დახვეწასა და გეფების შევსებას. სტარტაპ ბიურო დაკავებული იყო ქომიუნითი ბილდინგით, გაძლიერებული არაფორმალური განათლებით, ინსპირაციებით, ჩვენი მეთოდოლოგიები იძლეოდა შედეგებს, ნეთვორქინგი აკავშირებდა ადამიანებს, ქვეყანას ემატებოდა მეტი და მეტი დამფუძნებელი», — ამბობს გური.
ის აღნიშნავს, სტარტაპ ბიუროს წარმატებას მოჰყვა დამატებით ორი სიცარიელის ამოვსება მათი მხრიდან — შეიქმნა საქართველოს ინვესტორების ქსელი და საქართველოში შემოვიდა კიდევ ერთი საერთაშორისო აქსელერატორი, Founder Institute.
სტარტაპ ბიურო ახლა კრეატიული სააგენტოც არის, რომელიც კონკრეტულ პარტნიორთან ქმნის მთლიანად მასზე მორგებულ პროგრამებს — ეს შეიძლება იყოს პრე-აქსელერაციის პროგრამა მწვანე ეკონომიკაზე ან კონფერენცია ტურიზმის ტექ-ინდუსტრიაზე.
«ჩვენი წლევანდელი გამოწვევაა დეცენტრალიზაცია, რაც გულისხმობს ჩვენი ფორმატებისა და მეთოდოლოგიების საქართველოს სხვადასხვა ქალაქში შეტანას. რაც შეეხება თბილისს, შეგვიძლია ვთქვათ, რომ ეს შემდგარი სტარტაპ ქალაქია, როგორც ადგილობრივი დამფუძნებლებისთვის, ასევე, რეზიდენტებისა და ციფრული მომთაბარეებისთვის», — ამბობს გური.
გვიყვება იმასაც, რომ სტარტაპ ბიუროს პირველი 2 წლის განმავლობაში მუდმივი ზრდა ჰქონდა, თუმცა 2020 წელს, პანდემიის დროს ყველაფერმა ონლაინ გადაინაცვლა და რთული პერიოდი დადგა. როგორც გური ამბობს, ახლა კომპანია პოსტ-პანდემიური პერიოდიდან გამოდის და იმედი აქვს, რომ წელს 40-მდე პატარა, საშუალო და რამდენიმე მასშტაბური სტარტაპ ღონისძიების ორგანიზებასაც შეძლებენ.
