Python-ის სწავლა ონლაინ, უფასოდ, ქართულ ენაზე შეგიძლიათ.
პითონი არის მაღალი დონის, ზოგადი დანიშნულების პროგრამირების ენა, რომელიც, მათ შორის, მონაცემთა ანალიზისთვის გამოიყენება.
კომპანია ForSet-მა, MaxinAI-სთან თანამშრომლობით და USAID/Georgia-ის ეკონომიკური მმართველობის პროგრამის მხარდაჭერით, შექმნა სასწავლო პროგრამა მონაცემთა მეცნიერებაში.
კურსი, რომელიც Youtube-ზეა ატვირთული, 31 გაკვეთილს მოიცავს. თითო გაკვეთილის ხანგრძლივობა ერთიდან ორ საათამდეა. ნებისმიერ მსურველს შეუძლია, მთლიანი კურსი დამოუკიდებლად და სრულიად უფასოდ გაიაროს.
ForSet-ის ხელმძღვანელი, ნინო მაჭარაშვილი გვეუბნება, რომ კომპანიას წლების განმავლობაში, მუდმივად სთხოვდნენ, მონაცემთა ვიზუალიზაციასთან ერთად, მონაცემთა მეცნიერების სასწავლო პროგრამა გაეკეთებინათ და 2022 წელს ასეც მოიქცნენ.
«კურსი ონლაინ რეჟიმში ჩატარდა და მონაწილეობა 100-მდე ადამიანმა მიიღო, მათგან 7 საუკეთესო ახლა სტაჟირებასაც გადის MaxinAI-ში. კურსის დასრულების შემდეგ ჩანაწერები დავამუშავეთ და ფორსეტის იუთუბ არხზე გამოვაქვეყნეთ. გარდა იმისა, რომ ჩვენ თვითონვე შევარჩიეთ რამდენიმე ათეული მონაწილე, რომელიც კურსს ჩანაწერებით გადის და დამატებით რეგულარულ მხარდაჭერას იღებს ჩვენი ლექტორებისგან».
გარდა ამისა, როგორც ნინო გვეუბნება, მიუხედავად იმისა, რომ ინტერნეტში Phython-ის შესასწავლად ათეულობით რესურსია, კურსის ქართულ ენაზე მომზადება ქართული აუდიტორიისთვის მნიშვნელოვანი აღმოჩნდა.
«როგორც ჩანს, ენის ფაქტორი მაინც არის გარკვეული ბარიერი და ქართულენოვანმა სრულყოფილმა მასალებმა დიდი მოწონება დაიმსახურა. მონაცემთა მეცნიერების სასწავლო მასალის ციფრული ბიბლიოთეკის შექმნა ამ ეტაპზე ექსპერიმენტულია, ვიღებთ შენიშვნებს და კომენტარებს, რაც კურსის დახვეწაში დაგვეხმარება და, ამავდროულად, სამომავლოდ ვაპირებთ კურსის გამრავლფეროვნებას და მონაცემთა მეცნიერებისა თუ პროგრამირების მიმართულებით ახალი სასწავლო მასალების დამატებას».
