სამხრეთ კორეის პოლიციის ცნობით, კრიპტოსამყაროს ერთ-ერთი «ბოსი», დო კვონი. რომელიც 40 მილიარდი აშშ დოლარის ღირებულების terraUSD-ისა და Luna-ს ტოკენების ჩამოშლისა და განულების უკან დგას, მონტენეგროში დააკავეს.
სამხრეთ კორეის პოლიციის ცნობით, კრიპტოსამყაროს ერთ-ერთი «ბოსი», დო კვონი. რომელიც 40 მილიარდი აშშ დოლარის ღირებულების terraUSD-ისა და Luna-ს ტოკენების ჩამოშლისა და განულების უკან დგას, მონტენეგროში დააკავეს.
2023 წლის დასაწყისში, აშშ-ს მარეგულირებლებმა კვონი და მისი კომპანია, Terraform Labs მრავალი მილიარდი აშშ დოლარის თაღლითობით მითვისებაში დაადანაშაულეს, რაც ძირითადად ფასიან ქაღალდებსა და კრიპტო აქტივებს ეხება.
გასული წლის სექტემბერში, სამხრეთ კორეის ხელისუფლებამ კვონზე დაპატიმრების ორდერი გასცა, რადგან თვლიდნენ, რომ Terraform Labs-მა კაპიტალის ბაზრის წესები დაარღვია.
კვონმა ადრე უარყო, რომ იმალებოდა. თუმცა, თავისი ზუსტი ადგილმდებარეობა არასდროს გაუმხელია. სამხრეთ კორეის ხელისუფლება ვარაუდობდა, რომ კვონი სერბეთში იყო. ამ ორ ქვეყანას ექსტრადაციის ხელშეკრულება არ აქვს დადებული, ამიტომ მოლაპარაკებებისთვის ბელგრადში ოფიციალური პირები გაგზავნეს.
კვონის დაკავების შესახებ ინფორმაცია პირველად მონტენეგროს შინაგან საქმეთა მინისტრმა, ფილიპ აჯიჩმა გაავრცელა. მან დატვიტა, რომ მსოფლიოში ერთ-ერთი ყველაზე მოთხოვნადი ძებნილი დედაქალაქში, პოდგორიცას აეროპორტში დააკავეს.
აჯიჩმა დასძინა, რომ ეჭვმიტანილი, სავარაუდოდ, ყალბი დოკუმენტებითა და სახელით მოგზაურობდა. მისი თქმით, ინფორმაციის გავრცელებამდე, ხელისუფლება კაცის ვინაობის ოფიციალურ დადასტურებას ელოდებოდა.
სამხრეთ კორეის პოლიციამ თითის ანაბეჭდის საშუალებით დაადასტურა, რომ მონტენეგროში დაკავებული ეჭვმიტანილი კვონი იყო.
საბრალდებო დასკვნის მიხედვით, რომელიც მანჰეტენის აშშ-ის რაიონულ სასამართლოში გამოქვეყნდა, კვონს ბრალი ფასიანი ქაღალდების თაღლითობაში, საქონლის თაღლითობასა და შეთქმულებაში ედება.
თებერვალში, აშშ-ს ფინანსურმა მარეგულირებლებმა განაცხადეს, რომ კვონმა და სინგაპურში დაფუძნებულმა Terraform Labs-მა მომხმარებლებს სწორი და საჭირო ინფორმაცია არ მიაწოდეს, რამაც ინვესტორები შეცდომაში შეიყვანა და საბოლოოდ ორი ტოკენის ჩამოშლა გამოიწვია.
ამან მსხვილი კრიპტოვალუტების მასობრივი გაყიდვა გამოიწვია როგორიცაა Bitcoin, Ethereum და Tether. შედეგად, ტერმინი cryptocrash ონლაინ ტრენდი გახდა.
«ვდარდობ იმ ტკივილის გამო, რაც ჩემმა გამოგონებამ ყველას მოგაყენათ». — განაცახდა კვონმა TerraUSD-სა და Luna-ს ჩამოშლის შემდეგ.
