ილონ მასკმა X-ზე ალექსეი ნავალნის ცოლის, იულია ნავალნაიას ანგარიში დაბლოკა

ანტი-კორუფციულმა მოძრაობამ X-ზევე ჰკითხა ილონ მასკს, რა წესები დაარღვია დაღუპული რუსი პოლიტიკოსის ცოლმა. თუმცა, პასუხი არავის გაუცია. 

რუსი ოპოზიციონერი პოლიტიკოსი, ვლადიმირ პუტინის მწვავე კრიტიკოსი, ალექსეი ნავალნი 16 თებერვალს, ციმბირში მდებარე ციხეში გარდაიცვალა. სიკვდილის მიზეზი დაუდგენელია.

იულია ნავალნაიას განცხადებით, ის ალექსეის საქმეს გააგრძელებს. 

რუსეთის სასჯელაღსრულების უწყების განცხადებით, ალექსეი ნავალნი «გასეირნების შემდეგ ცუდად გახდა და, ფაქტობრივად, მაშინვე დაკარგა გონება».

ამ ვერსიის არ სჯერა ოჯახს, მათი თქმით, ნავალნი მოკლულია. 

ამასთან, ოჯახისთვის ნავალნის ცხედარი არ გადაუციათ და როგორც უთხრეს, კიდევ 2 კვირა არ გადასცემენ.