Hallo პასუხობს მათ შესახებ მობილური ვირტუალური ოპერატორების ComCom-ისთვის მიმართვას

8 დეკემბერს მობილური ვირტუალური ოპერატორების ასოციაციამ (MVNO) კომუნიკაციების კომისიას მიმართა, ძალაში დატოვოს გადაწყვეტილება, რომლის საფუძველზეც მნიშვნელოვანი საბაზრო ძალაუფლების მქონე მობილურ ოპერატორებს დაეკისრათ ვირტუალური ოპერატორის საკუთარ ქსელზე დაშვების ვალდებულება. 

კომენტარის დატოვება
Hallo პასუხობს მათ შესახებ მობილური ვირტუალური ოპერატორების ComCom-ისთვის მიმართვას

8 დეკემბერს მობილური ვირტუალური ოპერატორების ასოციაციამ (MVNO) კომუნიკაციების კომისიას მიმართა, ძალაში დატოვოს გადაწყვეტილება, რომლის საფუძველზეც მნიშვნელოვანი საბაზრო ძალაუფლების მქონე მობილურ ოპერატორებს დაეკისრათ ვირტუალური ოპერატორის საკუთარ ქსელზე დაშვების ვალდებულება. 

ასოციაციის წევრები არიან შპს ჯიენსი, შპს ინექსფონი და შპს მაიფონი. 

მათი განცხადებით, ამ მოთხოვნის მიზეზი შემდეგია:

სამივე კომპანიას ბოლო 3 წლის განმავლობაში როგორც საჯარო, ისე კერძო მიმართვებში არაერთხელ აქვთ გაცხადებული მზაობა და სურვილი, მოიპოვონ მობილურ ქსელზე ვირტუალური ოპერატორების დაშვება. ხოლო, დაპირებების მიუხედავად, ამ დრომდე ეს არ მომხდარა. 

თუმცა, MVNO-ს წევრების თქმით, სილქნეტმა ხელშეკრულება გააფორმა შპს ეკლეკტიკთან, რომლის თანახმადაც, 2022 წელს სატელეკომუნიკაციო ბაზარზე «ჰალოს» სახელით პირველმა ქართულმა ვირტუალურმა მობილურმა ოპერატორმა დაიწყო საქმიანობა და მას ახლა 80 აბონენტი ყავს. 

ასოციაციის წევრი კომპანიები აცხადებენ, რომ ზემოაღნიშნული ხელშეკრულება მათთვის მოულოდნელი იყო. 

ამასთან, მათი თქმით: 

«შპს ეკლეკტიკის» ბაზარზე გამოჩენა და ყოველგვარი შეფერხების გარეშე მათთვის ხელშეკრულების გაფორმება უამრავ ეჭვსა და კითხვას აჩენს. MVNO დაშვების მსურველ ასოციაციაში შემავალ კომპანიებს გვიჩნდება განცდა, რომ არსებული შეთანხმება შპს ეკლეკტიკსა და სს სილქნეტს შორის არა სატელეკომუნიკაციო ბაზრის განვითარებასა და მომხმარებელზე ორიენტირებული ახალი შეთავაზებების შექმნას, არამედ ფასადურად კომისიისთვის მიცემული პირობის შესრულებას ისახავს მიზნად».

კომპანიები მიუთითებენ, რომ ამ მათ ამ ეჭვს და კითხვის ნიშნებს რამდენიმე მნიშვნელოვანი ფაქტი კიდევ უფრო ამძაფრებს.

«საგულისხმოა, რომ ჰალოს შეთავაზება სილქნეტის პაკეტების იდენტურია და განსხვავება მხოლოდ ფასშია, კერძოდ, ჰალო 2 ლარით იაფია, ვიდრე სილქნეტი. ასევე, პოტენციური აბონენტისთვის ჰალოში პორტირება ან ახალი სიმ ბარათის აღება ისევე როგორც კომპანიასთან დაკავშირება დიდ სირთულეს წარმოადგენს — კომპანიას არ აქვს მითითებული მომსახურების წერტილების ზუსტი მისამართი, იურიდიულ მისამართზე არასდროს არავინ იმყოფება, უცნობია კომპანიის სამუშაო და არასამუშაო საათები, რაც ოპერირებისა და MVNO კომპანიისთვის სწორ სეგმენტზე გასასვლელად სასიცოცხლოდ აუცილებელია». — ნათქვამია ასოციაციის განცხადებაში. 

მათივე შეფასებით:

«კითხვის ნიშნებს აჩენს ასევე ის ფაქტიც, რომ კომპანია ისე გახდა MVNO ხელშეკრულების მფლობელი ჩვენამდე, რომ მარეგულირებელ კომისიაში არც კი ჰქონდა ავტორიზაცია გავლილი მაშინ, როდესაც ჩვენ, სამი ავტორიზებული კომპანია, სამი წელია ვიბრძვით და ვითხოვთ კონკრეტულ შეთავაზებებსა და წერილებზე პასუხს ქსელის ოპერატორებისგან». 

ასოციაცია აცხადებს, რომ ქსელის მფლობელი მობილური ოპერატორების მიერ არასათანადო რეაგირება და წინააღმდეგობრივი განწყობა იწვევს პროცესის სტაგნაციასა და გაურკვევლობას, რაც მათ პრობლემებს უქმნის როგორც პროცესის დაწყებაში, ასევე პარტნიორ საერთაშორისო ორგანიზაციებთან თანამშრომლობის მიმართულებითაც.

«ზემოთ ჩამოთვლილი ფაქტებისა და გარემოებების გამო, ვთვლით, რომ არამც თუ უნდა გაუქმდეს რეგულაცია, არამედ პირიქით კომისია უფრო აქტიურად უნდა ჩაერთოს ამ სფეროს რეგულირებაში. სწორედ ამიტომ კომუნიკაციების კომისიას მივმართავთ თხოვნით, არ გააუქმოს მობილური ვირტუალური ქსელის ოპერატორის სავალდებულო დაშვების გადაწყვეტილება». — აცხადებს ასოციაცია. 

საპასუხოდ დღეს, 14 დეკემბერს, ჰალომ თქვა, რომ მათ უკვე 1500 მომხმარებელი ჰყავთ და არა 80, როგორც ამას ასოციაციის წევრები ამბობენ. 

ასევე, ჰალოს თქმით, კომპანიას აქვს გრძელვადიანი კომერციული გეგმა, რომელიც გულისხმობს მიზნობრივი ბაზრის 5%-ის ათვისებას უახლოეს წლებში, რისთვისაც უკვე გადადგა რიგი ნაბიჯები.  

«დღეისათვის ჰალოს აქვს გაყიდვის 2 წერტილი:  (1) ქალაქ თბილისში, ი. ჭავჭავაძის გამზირი N66-ში, სადაც შესაძლებელია ყველა სერვისის მიღება (მაგალითად პორტირება, sim  ბარათის შეცვლა, ნომრის შეძენა) და (2) ქუთაისის საერთაშორისო აეროპორტში, რომლიც ფუნქციონირებს 2022 წლის 4 ნოემბრიდან. ასევე დამატებით, სადილერო ქსელის საშუალებით მთელი საქართველოს მასშტაბით ხორციელდება გაყიდვები». — ნათქვამია ჰალო-ს საპასუხო წერილში. 

ასევე, კომპანიის განცხადებით, ჰალოს დაწყებული აქვს მარკეტინგული კომუნიკაცია მომხმარებლებთან და მათ სთავაზობს ყველაზე მოთხოვნად პროდუქტზე — მობილურ ინტერნეტზე საინტერესო შეთავზებებს. 

«ჩვენთვის ბუნდოვანია, რატომ მოხდა მობილური ვირტუალური ოპერატორების (MVNO)  ასოციაციის წევრების ერთობლივი განცხადების გამოქვეყნება ისე, რომ განცხადებაში მოყვანილი გარემოებების სისწორე ჩვენთან არ გადამოწმდა. ჩვენ მიგვაჩნია, რომ პირველი ვირტუალური მობილური ოპერატორის გამოჩენა ძალიან საინტერესოა და ხელს უწყობს ბაზარზე კონკურენტუნარიანობის და მრავალფეროვნების ზრდას». — აცხადებს კომპანია.


განხილვა
კომენტარები ჯერ არაა.