ჩანგპენგ ჟაო: საქართველოში ოფისი აუცილებლად გვექნება

მან bm.ge-ის კითხვის პასუხად თქვა, რომ გაიზრდება ქვეყანაში თანამშრომლების რაოდენობაც. 

«საქართველოში ოფისი აუცილებლად გვექნება და ჩვენი წარმომადგენლობაც გაიზრდება. ამჟამად ქვეყანაში ორი თანამშრომელი გვყავს, თუმცა მათი რაოდენობა ძალიან სწრაფად გაიზრდება. მაგალითად გეტყვით, რომ გასულ წელს დუბაიში მხოლოდ ორი თანამშრომელი გვყავდა, ახლა კი მათი რაოდენობა 600-ს აღწევს. ვფიქრობთ და ვიმედოვნებთ, რომ საქართველოშიც ასეთი მკვეთრი ზრდა გვექნება.

ზოგადად, საქართველო უნიკალური ქვეყანაა, ის ევროპისა და აზიის გასაყარზეა, ნეიტრალურია და ბიზნესისთვის ხელსაყრელია». — თქვა ჩანგპენგ ჟაომ. 

Binance-ის დამფუძნებელი საქართველოში ჩამოვიდა და ირაკლი ღარიბაშვილს შეხვდა. ჩანგპენგ ჟაომ განაცხადა, რომ აღფრთოვანებულია საქართველოში არსებული გაციფრულების ტენდენციითა და ინოვაციების მიმღებლობით.

ჟაომ ასევე თქვა, რომ Binance-ი ადგილობრივ ბლოკჩეინ და კრიპტო პროექტებში ინვესტირების პერსპექტივასაც განიხილავს.

ქვეყანაში პირდაპირი ინვესტიციის განხორციელების საკითხთან დაკავშირებით bm.ge-ის შეკითხვაზე ჟაომ უპასუხა, რომ ქვეყანაში შესვლის დროს Binance-ი მრავალი სახის ინვესტიციას ახორციელებს, მათ შორისაა: ფიზიკური ინფრასტრუქტურის მოწყობა, კადრების გადამზადება და ადგილობრივ პროექტებსა თუ ბიზნესებში ინვესტირება. ჟაოს თქმით, როდესაც კომპანია ქვეყანაში შემოსვლას გადაწყვეტს, მას აუცილებლად მოჰყვება შესაბამისი FDI.

ჩანგპენგ ჟაომ აგრეთვე განაცხადა, რომ Binance-ს კონკურენტების და ინდუსტრიის სხვა მოთამაშეების მხრიდან დამატებითი ინვესტიციების მოზიდვის ეფექტიც აქვს, კერძოდ, როდესაც მსოფლიოს უმსხვილესი ბირჟა რომელიმე ქვეყანაში შედის, მას აუცილებლად მოჰყვებიან სხვა კომპანიებიც, რაც, საერთო ჯამში, ადგილობრივ ეკონომიკაში განხორციელებული ინვესტიციების რაოდენობას მნიშვნელოვნად ზრდის.