Binance-მ FTX-ის დახმარებაზე უარი თქვა, გარიგება არ შედგება

Binance-მ განაცხადა, რომ დიუ დილიჯენსის — ბიზნესის საქმიანობის შეფასების და საოპერაციო რისკების იდენტიფიცირების შემდეგ შეთანხმებას არ გააფორმებს. 

კომპანია ამბობს, «მომხმარებელთა თანხების არასწორად მოხმარებისა და ამაზე სავარაუდო გამოძიების შესახებ» ცნობებმა მის გადაწყვეტილებაზე გავლენა მოახდინა. 

FTX- კრიპტოვალუტის ბირჟა ფაქტობრივად ჩამოიშალა. ლიკვიდობის მნიშვნელოვნად შემცირება თანხის განაღდების ტალღამ განაპირობა — გავრცელდა ინფორმაცია, რომ FTX-ს ფინანსური პრობლემები ჰქონდა, შედეგად ბირჟიდან მხოლოდ 3 დღეში $6 მილიარდი გაიტანეს. 

8 ნოემბერს FTX-მა კონკურენტთან, Binance-თან «სამაშველო» კონტრაქტი გააფორმა.  თუმცა, როგორც გაირკვა, საბოლოოდ, შეთანხმება არ შედგა. 

2022 წელს კრიპტოვალუტის ფასები დაეცა, ვინაიდან მსოფლიო ფინანსურ ბაზრებზე ვარდნამ ინვესტორები აიძულა, უარი ეთქვათ უფრო სარისკო აქტივობებზე. 2020 და 2021 წლებში სწრაფი ზრდის შემდეგ, 2022 წელს ბიტკოინის ფასი დაახლოებით 62%-ით შემცირდა.