თანამედროვე სამყარო მთლიანად დროის დაზოგვაზეა გადასული — ნელ-ნელა მივდივართ იმისკენ, რომ ყველაფერი ადამიანის საჭიროებებზე იყოს მორგებული. დრო არის ის, რაც თითოეული ჩვენგანისთვის განსაკუთრებით მნიშვნელოვანია და თითქმის არასდროს გვყოფნის.
თანამედროვე სამყარო მთლიანად დროის დაზოგვაზეა გადასული — ნელ-ნელა მივდივართ იმისკენ, რომ ყველაფერი ადამიანის საჭიროებებზე იყოს მორგებული. დრო არის ის, რაც თითოეული ჩვენგანისთვის განსაკუთრებით მნიშვნელოვანია და თითქმის არასდროს გვყოფნის.
სწორედ ამის გამოც, ახალი ენების ონლაინ შესწავლა უფრო და უფრო პოპულარული ხდება. თუმცა, ვახტანგ ველიაშვილმა ამაზე ფიქრი გაცილებით ადრე დაიწყო. 2011 წელს მან პლატფორმა teach.ge დააფუძნა. მიზეზი მარტივი იყო — სურდა მამას ინგლისური ესწავლა.
«მამაჩემი მაშინ რუსეთში ცხოვრობდა და თავისთვის ეძებდა პლატფორმას, რომლის დახმარებითაც ენას ისწავლიდა, თუმცა, ეფექტური პლატფორმები ვერ ნახა. სწორედ ამიტომ, ჩვენ გადავწყვიტეთ, ენის შესასწავლად ეფექტური, სახალისო და ინტერაქციული პროგრამა შეგვექმნა»
ველიაშვილი იხსენებს, რომ ციფრული მოწყობილობებით თინეიჯერობიდან იყო დაინტერესებული და მუდმივად ცდილობდა, ეს ინტერესი დაეკმაყოფილებინა.
«დაახლოებით 14-15 წლის ასაკში თამაშები უკვე მომბეზრდა და მომინდა, მე თვითონ მიმეცა ბრძანებები კომპიუტერისთვის და ვყოფილიყავი შემოქმედი ციფრულ სამყაროში. 15 წლის ასაკში დავწერე პირველი პროგრამა. მაშინ მივხვდი, რომ სხვისი დაწერილი თამაშებით ისე ვერ ვერთობოდი, როგორც პროგრამების წერით».
მაშინ, როდესაც ჯერ კიდევ არავინ იცოდა სტარტაპის მნიშვნელობა, teach.ge-მ მოახერხა და მასობრივი ინტერესის საგნად იქცა. სწორედ გაზრდილი ინტერესი გახდა მიზეზი, რის გამოც კომპანიამ რებრენდინგი დაიწყო და საბოლოოდ მივიღეთ Lingwing, სადაც დღეს უკვე 270 ათასზე მეტი მომხმარებელია რეგისტრირებული. ამ რაოდენობის მომხმარებლებისთვის კომფორტული და დახვეწილი სასწავლო პროგრამის შექმნაზე კი სულ ათი ადამიანი მუშაობს.
Lingwing.com-ზე შვიდი ენის: ინგლისურის, გერმანულის, ესპანურის, იტალიურის, რუსულის, ფრანგულისა და ქართულის სწავლა შეგიძლიათ.
«ძალიან ადრე ვერ ვიღვიძებ, უმეტესად 09:00 საათზე, რადგან ოფისში საკმაოდ გვიანობამდე ვარ ხოლმე. პირველი ყოველთვის იმას ვაკეთებ, რაც იმ მომენტისთვის პრიორიტეტად გვაქვს განსაზღვრული. ამ ეტაპზე ეს საიტის გადაწერაა».
უცხო ენების შემსწავლელი საიტი და აპლიკაცია თავის თავში რამდენიმე ტიპის დავალებას აერთიანებს, მათ შორის: თარგმანი, კარნახი, დიალოგი, გრამატიკა და შეცდომების გასწორება. სპეციალურად ამ პროდუქტისთვის შექმნილი კოდი სხვადასხვა მხრიდან უდგება მომხმარებელს, იმახსოვრებს მის შეცდომებსა თუ პროგრესს და სწორედ ამის მიხედვით იმეორებს დავალებებს.
«გვინდოდა, პროგრამაში მომხმარებლის მაქსიმალური ჩართულობა ყოფილიყო. ამისთვის გამოვიყენეთ მთლიანად ინტერაქციული მეთოდი. მომხმარებელი ან წერს, ან ესაუბრება კომპიუტერს და ის იგებს. თუმცა, ახლა ვგეგმავთ, კიდევ ერთხელ გადავწეროთ ეს კოდი, იმიტომ, რომ ტექნოლოგიები სწრაფად იცვლება და 4-5 წლის წინ დაწერილი პროგრამა უკვე მოძველდა, გვიწევს ახლის გაკეთება».
საიტს/აპლიკაციას ძირითადად საქართველოში მცხოვრები ან ქვეყნიდან ემიგრაციაში წასული მოქალაქეები მოიხმარენ. ველიაშვილის თქმით, მიზეზი, რის გამოც, Lingwing წარმატებული პროდუქტია, არის ის, რომ აქ ენის სწავლებას არ უყურებენ, როგორც პედაგოგები. პირიქით, მომხმარებლის ინტერესებზე მორგება ხდება მათი ჩართულობით და მათი პერსპექტივიდან.
«ჩვენ მოვხსენით ენის სწავლის შიში და გავხადეთ ეს აზარტული. ჩვენი მეთოდოლოგია მთლიანად დაფუძნებულია მომხმარებლის ნაცნობ ქცევაზე, როგორიც არის ჩათი და როცა ენის სწავლა გინდა, ყველაზე ეფექტურია კომუნიკაცია უცხო ენაზე. ჩათვალეთ, რომ მესენჯერია უცხო ენაზე. თუ რაღაც არ იცით, მინიშნებებია და მათი დახმარებით გადიხართ ფონს. ამ ტიპის ინტერფეისი მომხმარებელს მაქსიმალურად აძლევს იმის შეგრძნებას, რომ აქტიურ კომუნიკაციაშია უცხოელთან».
პანდემიამ და სახლში გამოკეტვამ ბევრი ადამიანი დაარწმუნა იმაში, რომ შესაძლებელია ეს დრო სასარგებლოდაც გამოიყენოს. ამაზე მოწმობს ისიც, რომ კარანტინის დროს Lingwing-ის მომხმარებლების რიცხვი გაიზარდა.
«პანდემიის პერიოდში სამჯერ გაიზარდა გაყიდვები და საკმაოდ პროდუქტიული პერიოდი იყო, თუმცა ონლაინ სწავლება ახლაც არ კარგავს აქტუალობას — გართულებული სატრანსპორტო მოძრაობის გამო, ფაქტობრივად შეუძლებელია მასწავლებელთან სიარული და რადგან მეტი დრო იხარჯება, მომხმარებელს ურჩევნია ეს Lingwing-ზე გააკეთოს»
თუმცა, ვახტანგ ველიაშვილის თქმით, ჯერ-ჯერობით კიდევ ბევრია გასაკეთებელი იმისთვის, რომ გლობალურ ბაზარზე საკუთარი ადგილი დაიკავონ.
